ނޮވެމްބަރުމަހު ބާއްވާ އެމެރިކާގެ މިޑްޓާމް އިންތިޚާބުގައި އެމެރިކާގެ ރައީސް ޑޮނަލްޑް ޓްރަމްޕްގެ ސިޔާސަތުތަކަށް ތާއީދުކޮށް އޭނާއަށް ވޯޓު ނުދޭން އީރާނުގެ އިންގިލާބީ ލަޝްކަރުން އެމެރިކާގެ ރައްޔިތުންނަށް އިލްތިމާސްކޮށްފިއެވެ.
އީރާނުގެ އިންގިލާބީ ލަޝްކަރުން މިކަމަށް އިލްތިމާސްކުރީ، އެމެރިކާގެ އާންމު ރައްޔިތުންނަށް އަމާޒުކޮށް އާންމުކުރި ހުޅުވާލެވިފައިވާ ސިޓީއެއްގައެވެ. މިއީ 25 ސަފްހާގެ ސިޓީއެކެވެ.
އެ ސިޓީގައި އީރާނުގެ އިންގިލާބީ ލަޝްކަރު – އައިއާރްޖީސީން އެމެރިކާގެ ރައްޔިތުންނަށް ގޮވާލާފައިވަނީ، ރައީސް ޑޮނަލްޑް ޓްރަމްޕްގެ ސިޔާސަތުތަކާ ދެކޮޅު ހެދުމަށާއި، ސުލްހަވެރިކަމާއެކު އެއްތަނެއްގައި ދިރިއުޅުމުގެ ހުށަހެޅުން ގަބޫލުކުރުމަށެވެ.
އެމެރިކާއިން އިސްރާއީލަށް ކުރާ ތާއީދާ ދެކޮޅު ހެދުމަށާއި އަދި އެމެރިކާއިން ގައުމުން ބޭރުގައި ކުރާ ހަނގުރާމަތަކާ ދެކޮޅުހެދުމަށްވެސް އިލްތިމާސް ކޮށްފައި ވެއެވެ.
އީރާނުގެ އިންގިލާބީ ލަޝްކަރުން ބުނެފައިވަނީ، އީރާނާ ދެކޮޅަށް އެމެރިކާއިން ގެންގުޅޭ ސިޔާސަތުތަކަށް ބަދަލު ގެނެސްފިނަމަ، އީރާނާއި އެމެރިކާއަކީވެސް އެއްކޮށް އުޅެވިދާނެ ދެގައުމު ކަމަށެވެ.
އީރާނުން ކުރިއަށްގެންދާ ނިއުކްލިއަރ ޕްރޮގްރާމަކީ ސުލްހަވެރި ބޭނުމަށް ކުރިއަށްގެންދާ ޕްރޮގްރާމެއް ނަމަވެސް، އެ ހަގީގަތް އޮޅުވާލަން އެމެރިކާގެ ރައީސް ޓްރަމްޕް މަސައްކަތް ކުރާތީ އެކަން އިންގިލާބީ ލަޝްކަރުގެ ސިޓީގައި ވަރަށް ބޮޑަށް ކުށްވެރި ކޮށްފައި ވެއެވެ. އީރާނުގެ ނިއުކްލިއަރ ޕްރޮގްރާމަކީ ނުރައްކަލެއްގެ ގޮތުގައި އެމެރިކާއަށް ވިސްނައިދެމުން ގެންދަނީ އިސްރާއީލުން ކަމަށްވެސް ބުނެފައި ވެއެވެ.
އީރާނުގެ އިންގިލާބީ ލަޝްކަރުގެ ތަރުޖަމާނު ހުސައިން މުހައްބީ ވިދާޅުވީ، އައިއާރްޖީސީގެ ސިޓީގެ ސަބަބުން އެމެރިކާ ސަރުކާރުގެ އަމަލުތަކަށް އެއްވެސް ބަދަލެއް އަތުވެދާނެ ކަމަށް އިންގިލާބީ ލަޝްކަރުން އުންމީދު ނުކުރާ ކަމަށެވެ. އެހެން ނަމަވެސް ބޭނުންވަނީ އެމެރިކާގެ ރައްޔިތުންނަށް މެސެޖް ފޯރުކޮށްދިނުމަށް ކަމަށް ވިދާޅުވިއެވެ.
މައިދާނުގައި ހިނގަމުންދާ ގިނަ ކަންކަމުގެ މައުލޫމާތު އެމެރިކާގެ ރައްޔިތުންނަށް ނޭނގޭ ކަމަށާއި، ކަމުގެ ހަގީގީ ރަނގަޅު މައުލޫމާތު އިތުރަށް އެނގިއްޖެނަމަ އެމެރިކާ ރައްޔިތުން ތަފާތު ގޮތަކަށް ވިސްނައި، ނިންމުންތައް ނިންމާނެ ކަމަށް ގަބޫލުކުރާ ކަމަށްވެސް ހުސައިން މުހައްބީ ވިދާޅުވިއެވެ.
މުހައްބީ ވިދާޅުވީ، އީރާނުން އުޅެނީ ނިއުކްލިއަރ ހަތިޔާރު ހޯދަން ނޫންކަން އެމެރިކާއަށް ރަނގަޅަށް އެނގޭ ކަމަށެވެ.
އެމެރިކާގެ ގައުމީ ސަލާމަތަށް ނުރައްކާކޮށް، އެގައުމުގެ ސިފައިންގެ ދިރިއުޅުން ހަވާލުކޮށްފައިވަނީ ވެރިކަމުގައި ހުރި މޮޔައެއްކަހަލަ ބޮޑު ދޮގުވެރިއެއްގެ ސަބަބުން ކަމަށާއި، އޭނާގެ ހަމައެކަނި މަގްސަދަކީ މުއްސަނދިކަން ޖަމާކުރުން ކަމަށްވެސް އީރާނުގެ އިންގިލާބީ ލަޝްކަރުގެ ތަރުޖަމާނު ވިދާޅުވިއެވެ.
ނޮވެމްބަރުމަހު ބާއްވާ އެމެރިކާގެ މިޑްޓާމް އިންތިޚާބު ކާމިޔާބު ކުރުމަށްޓަކައި އެމެރިކާގެ ރައީސް ގެންދަނީ އީރާނު ހަނގުރާމަ ކޮޅެއްގައި ޖައްސަން ގަދައަޅައި މަސައްކަތް ކުރަމުންނެވެ. މިހާތަނަށް ބޭއްވި ޕްރައިމެރީތަކާއި، ޚިޔާލު ހޯދުންތަކުންވެސް ދައްކަނީ އިންތިޚާބުގައި ވެރިކަންކުރާ ރިޕަބްލިކަން ޕާޓީ ބަލިވާނޭ ކަމަށެވެ.
އީރާނުން ގޮތް ދޫނުކޮށް ހިފަހައްޓާތީ އެމެރިކާގެ ރައީސް ޓްރަމްޕް މިމަހުގެ ކުރީކޮޅު ބުނީ، އީރާނުން މަސައްކަތް ކުރަނީ އިންތިޚާބަށް ހުރަސްއަޅައި އޭނާ ބަލިކޮށްލުމަށް ކަމަށެވެ.
