އިނގިރޭސި ރޯޔަލް އެއަރފޯސް ފެއަރފޯޑް އެއަރ ބޭހަށް ދޭން އުޅުނު ހަމަލާގައި އީރާނުގެ ބައިވެރިވުން ހިމެނޭ ކަމަށް ވަރަށް ބޮޑަށް ބެލެވޭ ކަމަށް އިނގިރޭސި ބޮޑުވަޒީރު އެންޑީ ބާންހަމް ވިދާޅުވެއްޖެއެވެ.
ބީބީސީއަށް ދެއްވި އިންޓަރވިއުއެއްގައި ބޮޑުވަޒީރު އިނގިރޭސި ބޮޑުވަޒީރު ވިދާޅުވީ، އެއަރބޭސް ކައިރީގައި ހިނގި ޝައްކުކުރެވޭ ހަރަކާތްތަކުގައި އީރާނުގެ ބައިވެރިވުން އޮތްކަމުގެ “ވަރުގަދަ އިޝާރާތްތަކެއް” ލިބިފައިވާ ކަމަށެވެ.
ނަމަވެސް، އެއީ ކޮން ކަންތައްތަކެއް ކަމެއް ވިދާޅެއް ނުވެއެވެ.
މޫނު ނިވާކޮށްގެން ތިބި ބަޔަކު 3 ވޭނެއްގައި ގޮސް އެއަރބޭސް ކައިރީގައި ހަރަކާތްތެރިވަނިކޮށް އަތުލައިގެންފައިވަނީ ހަފްތާ ބަންދު ތެރޭގައެވެ.
ރޯޔަލް އެއަރފޯސް ފެއަރފޯޑް އެއަރ ބޭހަކީ، އީރާނަށް ބޮން އެޅުމަށް އެމެރިކާ ސިފައިން ބޭނުންކުރި އެއަރ ބޭހެކެވެ. އީރާނަށް ބޮންއަޅަން އެމެރިކާއިން ބޭނުންކުރި ބީ-1 މަތިންދާ ބޯޓުތައް ބަހައްޓާފައި ހުންނަނީވެސް މި ބޭހުގައެވެ.
ފެއަރފޯޑް ބޭހަކީ އީރާނުގެ ރައްދު ހަމަލާތަކުގެ އަމާޒެއް ކަމަށް އީރާނުން ޖުލައިމަހުގެ ތެރޭގައި އިއުލާން ކޮށްފައިވެސް ވެއެވެ.
އާންމު މީހަކު ކުރި ރިޕޯޓަކާ ގުޅިގެން ސަލާމަތީ ބާރުތަކުން މޫނު ނިވާކޮށްގެން ތިބި 5 މީހަކު ހައްޔަރުކުރިއިރު، އެމީހުން ބޭނުންކުރި ވޭންތަކުން ގިނަ އަދަދެއްގެ ގޮވާތަކެތި ފެނިފައިވާ ކަމަށްވެސް ބުނެފައި ވެއެވެ.
މޫނު ނިވާކޮށްގެން ތިބި މީހުން މަސައްކަތް ކުރީ އެއަރ ބޭހުގެ ތެރެއަށް ވަދެގަނެ، ބޮންއަޅާ ބޯޓުތަކުގައި ގޮވާތަކެތި ހަރުކޮށް ގޮއްވާލަން ކަމަށް ސަލާމަތީ ފަރާތްތަކުން ތުހުމަތު ކުރެއެވެ.
މީޑިއާ ރިޕޯޓްތައް ބުނާގޮތުގައި ސަލާމަތީ ބާރުތަކުން ހައްޔަރުކުރި 5 މީހުންނަކީވެސް ލަންޑަނަށް ނިސްބަތްވާ އިނގިރޭސި ރައްޔިތުންނެވެ. އެކަމަކު އެމީހުންގެ ވަނަވަރެއް ހާމައެއް ނުކުރެއެވެ.
ހައްޔަރުކުރިތާ ދެދުވަސްވެސް ނުވަނީސް އެމީހުންވަނީ ވަގުތީގޮތުން މިނިވަން ކޮށްފައެވެ. އެކަމާ ގުޅިގެން ބޮޑެތި ފާޑުކިއުންތައް އިނގިރޭސި ސަރުކާރަށް އަމާޒުވެފައިވެސް ވެއެވެ.
މިކަމުގައި އީރާނު ބައިވެރިވާ ކަމަށް “ވަރަށް ބޮޑަށް ބެލެވޭ ކަމަށް” އިނގިރޭސި ބޮޑުވަޒީރު ވިދާޅުވިއިރު، މިކަމާ އީރާނާ ގުޅުވައި އިނގިރޭސިވިލާތުގެ ރައްޔިތުންނާއި ނޫސްތަކުން ވާހަކަތައް ފަތުރާތީ އީރާނުން އެކަން ކުރިން ކުށްވެރި ކޮށްފައި ވެއެވެ.
އިނގިރޭސިވިލާތުގައި ހުންނަ އީރާނު އެމްބަސީން ނެރުނު ބަޔާނެއްގައި ބުނެފައިވަނީ، އެއީ އީރާނާ އެއްވެސް ގުޅުމެއް ހުރި ކަމެއް ނޫން ކަމަށެވެ.
އީރާނާ ގުޅުވައި މިފަދަ ސާބިތު ނުހިފޭ ދޮގާއި އޮޅުވާޅުމުގެ ވާހަކަތައް ފަތުރާ ފަރާތްތަކާ ދެކޮޅަށް ގާނޫނީ ފިޔަވަޅު އަޅާނެކަމުގެ އިންޒާރުވެސް ދީފައިވެއެވެ.
