ހޯރަފުށީ އެއާޕޯޓުގައި މުވައްޒަފުން ތިބޭ ކޮޓަރީގެ ސިލިންގު ބޮލަށް ފައިބައިފިއެވެ.
މިއަދު މެންދުރު ގޮށްކޮޅަށް ލިބިފައިވާ ވީޑިއޯއަކުން ފެންނަގޮތުގައި ހޯރަފުށީ އެއާޕޯޓުގައި މުވައްޒަފުން ތިބޭ ކޮޓަރީގެ ސީލިންގުގެ ބައިތަކެއް ވެއްޓިފައި ވެއެވެ.
އެ ވީޑިއޯގައި ފެންނަގޮތުން ވެއްޓިފައިވާ ސިލިންގުގެ ބައެއް ބައިތައް މުވައްޒަފުން ނިދާ އެނދަށްވެސް ވެއްޓިފައި ވާތަން ފެނެއެވެ. އަނެއް ކޮޓަރީގައި ސީލިންގު ވެއްޓިފައި ވަނީ އެ ކޮޓަރީގެ ހުސްތަނާއި ދިމާލުންނެވެ.
ސީލިންގު ވެއްޓުނު އިރު ކޮޓަރީގައި މުވައްޒަފުންވެސް ތިބި ކަމަށާއި، ނަސީބު ރަނގަޅު ކަމުން މުވައްޒަފަކަށް ގެއްލުންނުލިބި ސަލާމަތް ވެފައި ވާކަމަށް އެރަށުން ނަން ހާމަނުކުރުމަށް ޝަރުތުކޮށް މައުލޫމާތު ދިން ފަރާތެއް ވިދާޅުވިއެވެ.
މީގެ އިތުރުން މިއަދު ހެނދުނު 10 ޖެހިއިރު ނެގި ވިއްސާރަ ވިލާގަނޑާއެކު އެއާޕޯޓު ޓާމިނަލްގައި ހަރުކޮށްފައި ހުރި ދޮރުތައް ވެއްޓި ބިއްލޫރިތައް ވަނީ ތަޅައިގެން ގޮސްފައެވެ.
ހޯރަފުށީ އެއާޕޯޓު ރަސްމީކޮށް ހުޅުވީ 19 ނޮވެމްބަރު 2020 ގައެވެ. އެ އެއާޕޯޓުގައި 1،200 މީޓަރުގެ ރަންވޭއަކާއި 8،635 އަކަމީޓަރުގެ އޭޕްރަންއަކާއި ޓެކްސީވޭއެއް އޮވެއެވެ.
