ހޯރަފުށީ އެއާޕޯޓަށް އާދަޔާ ހިލާފަށް އުދަ އަރަމުން އެބަދެއެވެ.
ހޯރަފުށީ އެއާޕޯޓުގައި ހުރި މުވައްޒަފަކު ވިދާޅުވީ ވަރަށް ބޮޑަށް އުދަ އަރަމުން ދާކަމަށާއިިިި، އުދަ އެރުމުގެ ސަބަބުން ވެހިކަލް ނުދުއްވޭ ކަމަށާއި، ރަންވޭއާއި އަވަށާއި ގުޅުވައިދޭ މަގުގެ އެއްފަރާތުން އަނެއްފަރާތަށް ރާޅު އަރަމުން ދާކަމަށެވެ. އަދި އުދަ އެރުމުގެ ސަބަބުން މުޅި އޭޕުރަން މަތީ އޮތީ ވެއްޔާއި ގައު ކަމަށްވެސް އެފަރާތުން މައުލޫމާތު ދެއެވެ.
އިއްޔެ ހެނދުނު 10 ޖެހިއިރު ނެގި ވިއްސާރަ ވިލާގަނޑާއެކު އެއާޕޯޓު ޓާމިނަލްގައި ހަރުކޮށްފައި ހުރި ދޮރުތައް ވެއްޓި ބިއްލޫރިތައް ވަނީ ތަޅައިގެން ގޮސްފައެވެ. އަދި ހޯރަފުށީ އެއާޕޯޓުގައި މުވައްޒަފުން ތިބޭ ކޮޓަރީގެ ސިލިންގުވެސް ވަނީ ހަލާކުވެފައެވެ.
މިއަދު ލިބިފައިވާ ފޮޓޯތަކުން ފެންނަ ގޮތުގައި ހޯރަފުށީ އެއާޕޯޓު ކޮޓަރި ސީލިންގު ވަނީ ވަރަށް ބޮޑަށް ވެއްޓިފައެވެ. އަދި އެ ކޮޓަރިތަކުގައި މީހުން ދިރިއުޅެން އެކަށީގެން ނުވާނެތީ މުވައްޒަފުން ވަނީ އެހެން ތަނަކަށް ބަދަލުވެފައެވެ.
