ށ.ފުނަދޫ މޮނިޓަރިން ހާލަތަށް ގެނެސްފައިވުމާއެކު އެރަށުގެ ކޯވިޑްގެ ހާލަތު ވަޒަން ކުރުމަށް ނެގި ހުރިހާ ރެންޑަމް ސާމްޕަލެއް ނެގެޓިވް ވެއްޖެއެވެ.
ށ. އަތޮޅު ހޮސްޕިޓަލުން ވިދާޅުވީ، އެރަށް މޮނިޓަރިންގައި އޮތުމާއެކު ކޯވިޑް ބަލިއުޅޭ މިންވަރު ދެނެގަތުމަށް 127 ރެންޑަމް ސާމްޕަލެއް ނެގުނުކަމަށެވެ.
އެ ސާމްޕަލްތަކުގެ ނަތީޖާ މިއަދު ލިބުނުއިރު ހުރިހާ ސާމްޕަލެއްވެސް ނެގެޓިވް ވެފައިވާކަމަށް އެ ހޮސްޕިޓަލުން ވިދާޅުވިއެވެ. އެހެންނަމަވެސް މިހާރެކޭވެސް އެއްގޮތަށް ބަލިން ރައްކާތެރިވެ ތިބުމަށް ދީފައިވާ އިރުޝާދުތަކާއި، އަޅާފައިވާ ފިޔަވަޅުތަކާއި އެއްގޮތަށް އަމަލުކުރަމުން ގެންދިޔުމަށް އެ ހޮސްޕިޓަލުން ވަނީ އެދިފައެވެ.
މެއި 4 ވަނަ ދުވަހު އެރަށަށް ބަނދަރުކުރި، އެރަށު ސޯސަން އެކްސްޕްރެސް ބޯޓުން ދެ މީހަކު ޕޮޒިޓިވްވެ، އެ ފަޅުވެރިންނާއެކު އެ ބޯޓު ވެސް ވަނީ 14 ދުވަހަށް ކަރަންޓީނު ކޮށްފައެވެ.
ފުނަދޫން އެރަށު ސްކޫލްގެ ދަރިވަރަކު މިމަހުގެ 1 ވަނަ ދުވަހު ޕޮޒިޓިވްވުމުން ކަރަންޓީނުކުރި ފަރާތްތަކުގެ ތެރެއިން ރިލީޒް ސާމްޕަލް ނަގަންޖެހޭ ފަރާތްތަކު ސާމްޕަލްތައް ނެގެޓިވް ވުމުން އެ ކްލާސްޓާއާއި ގުޅިގެން ކަރަންޓީނު ކުރި 26 ގެއެއް ވެސް އިއްޔެ ވަނީ ކަރަންޓީނުން ވީއްލާފައެވެ.
