އިންޓަނޭޝަނަލް އެއިޑް ކެމްޕެއިން (އައިއޭސީ) މެދުވެރިކޮށް ދިވެހިންގެ އެހީ ފަލަސްތީނުގެ ޣާޒާގައި މަގުމަތިވެފައިވާ 200 އާއިލާއަކަށް ފޯރުކޮށްދީފިއެވެ.
އައިއޭސީން ބުނީ، ދިވެހިންގެ އެހީގައި އެ ހަރަކާތުން ޣާޒާ އާރާސްތު ކުރުމަށް ކުރަމުންދާ މަސައްކަތުގެ ތެރެއިން އެންމެ މުހިންމު ކަމެއްގެ ގޮތުގައި މިވަގުތު ކުރަމުން ދަނީ އެގައުމުގެ ރައްޔިތުންނަށް މިވަގުތަށް ބޭނުންވާނެ އެންމެ ޒަރޫރީ ކަންކަން ފުއްދައިދިނުން ކަމަށެވެ.
އެގޮތުން ތުއްތު ކުދީންނަށް ބޭނުންޖެހިފައި ހުރި ކަންކަން ބަލައި އެކުދީންނަށް ހާއްސަކޮށްގެން ދިވެހިންގެ އެހީގައި ޒަރޫރީ ތަކެތި ފޯރުކޮށްދީފައިވާ ކަމަށް އައިއޭސީން ބުންޏެވެ.
އައިއޭސީން ވަނީ ޣާޒާގެ ކުޑަކުދިންނަށް ނެޕީ، ކިރު ދަޅު، ޓީޝޫ އަދި ވެޓް ޓިޝޫ ފަދަ ތަކެތި ހިމެނޭ ގޮތަށް 200 އާއިލާއަކަށް ޕެކޭޖު ހަދިޔާކޮށްފައެވެ. އަދި މި ތަކެއްޗަކީ މަގުމަތިވެފައިވާ އާއިލާތަކަށް ވަރަށް ބޮޑު އެހީއަކަށް ވާނެ ކަމަށް އައިއޭސީން ބުނެއެވެ.
އިސްރާއީލުގެ އުދުވާނީ ބާރުތަކުން ވަށައިގެން ބަންދުކޮށްފައިވާ ޣާޒާގައި ދެ މިލިއަން މީހުން ދިރިއުޅޭ އިރު، އޭގެ ތެރެއިން ދެބައިކުޅަ އެއްބަޔަކީ 18 އަހަރު ނުފުރޭ ކުޑަކުދިންނެވެ.
