ހަނިމާދޫ ޞިއްހީ މަރުކަޒާއި ކެތިއަރާއިން ގުޅިގެން ތައްޔާރުކޮށްފައިވާ ރަށުހާލަތު ވެބްސައިޓް ލޯންޗުކުރުމަށް ހަނިމާދޫ ޞިއްހީ މަރުކަޒާއި ކައުންސިލް މަޝްވަރާކޮށްފިއެވެ.
މި މަޝްވަރާ ބައްދަލުވުން ކުރިއަށް ގެންގޮސްފައިވަނީ މިއަދު ހެނދުނު ހަނިމާދޫ ކައުންސިލް އިދާރާގައެވެ. މިބައްދަލުވުމުގައި ބައިވެރިވީ، ކެތިއަރާ ޖަމިއްޔާއާއި، ހަނިމާދޫ ސިއްހީ މަރުކަޒުގެ މުވައްޒަފުންނާއި، ކައުންސިލް މެމްބަރުންނެވެ.
މި ބައްދަލުވުމާއި ބެހޭގޮތުން ގޮށްކޮޅަށް މައުލޫމާތު ދެއްވަމުން ހަނިމާދޫ ކައުންސިލްގެ ނައިބުރައީސް ފިރާޤް މުޙައްމަދު ވިދާޅުވީ މިއަދު ބައްދަލުވުމުގައި މަޝްވަރާކުރެވުނީ ކޮވިޑް-19 ގެ ބަލިމަޑުކަމުގެ މިހާލަތުގައި އިދާރަތައް ގުޅިގެން މައުލޫމާތު ހިއްސާކުރުމުގެ މުހިއްމުކަމާއި ރައްޔިތުންނަށް ފަސޭހައިން މައުލޫމާތު ލިބޭނެ ގޮތެއް ރޭވުމަށް ކަމަށެވެ.
“ރަށުހާލަތު ވެބްސައިޓް ގައި ހިމެނޭ ބައިތަކަށް ބޭނުންވާ މައުލޫމާތު ވީ އެންމެ ބޮޑަކަށް ހިއްސާކުރުމަށް ދެފަރާތުން މަޝްވަރާކުރެވުނީ.” ހަނިމާދޫ ކައުންސިލްގެ ނައިބުރައީސް ފިރާޤް މުޙައްމަދު ވިދާޅުވީއެވެ.
ކެތިއަރާއިން އިސްނަގައި ތައްޔާރުކޮށްދީފައި މިވާ ވެބްސައިޓުގައި ކަރަންޓީން ކުރެވިފައިވާ ތަންތަން، ރަށުގެ ބަލީގެ ހާލަތު، އަދި މިނޫންވެސް ކޮވިޑް-19 އާއި ގުޅޭ ތަފާތު އެތައް މައުލޫމާތެއް ހިމެނެއެވެ.
މިއަދު މި ވެބްސައިޓް ލޯންޗު ކުރެވިގެން ދާނެކަމަށް ކެތިއަރާއިން ވިދާޅުވެއެވެ.
މި ލޯންޗިން ހަފުލާ ގޮށްކޮޅުން ދުރަށް ފޮނުވަން ވަނީ ހަމަޖެހިފައެވެ.
