ޢަލްމާނީ ފިކުރަކީ އިންސާނީ ޙަޔާތުގެ އެކިއެކި ދާއިރާތަކުން ދީން ދުރުކޮށް އެކަހެރި ކުރާން ގޮވައިލާ ފިކުރެވެ. ސިޔާސީ، އިޖުތިމާޢީ، ތަޢުލީމީ، އިޤްތިޞާދީ، އަޚްލާޤީ މި ހުރިހާ ދާއިރާއަކުން ވެސް ދީން އެއްފަރާތްކޮށްލުމަށް ވަކާލާތު ކުރާ ފިކުރެކެވެ. އެއަށްފަހު އިންސާނީ ޙަޔާތުގެ މި ހުރިހާ ދާއިރާތަކަކަށް ވެސް މާއްދީ ވިސްނުމާއި ޚިޔާލާއި ފިކުރުގެ މައްޗަށް ކަންކަން ތަރުތީބުކޮށް އެތުރުމަށް ގޮވާލާ ފިކުރެކެވެ.
އެއީ އިންސާނާ ނެތުމުގެ ތެރެއިން ވުޖޫދަށް ގެންނަވައި، ދުނިޔޭގައި އެ އިންސާނާ ލެއްވި ޚާލިޤުވަންތަ މާތް ﷲ، އެ އިންސާނާ އުޅުމަށް ރުހިވޮޑިގެން، ޙަޔާތުގެ ހުރިހާ ދާއިރާއެއް ހިމެނޭނެހެން ބާއްވައިލެއްވި ނިޒާމެވެ. ދީނެވެ. ޙަޔާތުގެ ދުސްތޫރެވެ. ދެ ދުނިޔޭގެ ބާއްޖަވެރިކަމަށް މަގު ދައްކައިދޭ މަގުޗާޓެވެ.
އެހެންކަމުން، އިސްލާމީ މުޖުތަމަޢެއްގައި ޢަލްމާނީ ފިކުރަށް ގޮވައިލެވޭނެ އެއްވެސް ޙުއްޖަތެއް ނެތެވެ. އިސްލާމީ މުޖުތަމަޢެއްގައި ޢަލްމާނިއްޔަތަށް ގޮވައިލުމަކީ، މުސްލިމުންގެ ޙަޔާތުން އިސްލާމްދީން ނެރެ އެއްލައިލުމަށް ގޮވައިލުމެވެ. އިންސާނާ އަކީ ރައްބެއް ރަސޫލެއްގެ އަމުރުފުޅުތަކާއި އިރުޝާދުފުޅުތަކަށް ބޯލަނބަން ޖެހޭ މީހެއް ނޫން ކަމުގައި ކަނޑައެޅުމަށް ގޮވައިލުމެވެ. މިއީ އޭގެ ޒާތުގައި އިސްލާމްދީން ދޫކޮށް ކުފުރަށް ގޮވައިލުމެވެ. އެހެނީ، ޙަޔާތުގެ މި ދެންނެވި މައިދާނުން ދީން ބޭރުކޮށްފިނަމަ، ދެން އެ މީހަކު ފުރިހަމަ މުސްލިމަކަށް ވާނެ އެއްވެސް ގޮތެއް ނޯންނާނެއެވެ. އޭނާ އަކީ މާތް ﷲ އާއި އެކަލާނގެ ރަސޫލާ صَلَّى اللهُ عَلَيْهِ وَسَلَّمގެ ޙުކުމްފުޅުތަކަށް ރުހިގެން ހުރި މީހަކަށް ނުވާނެއެވެ. ޝަހާދަތުގެ ދެ ކަލިމަ ލާޒިމުކުރަނީ ކޮންމެ މުސްލިމަކު ވެސް މާތް ﷲ އާއި އެކަލާނގެ ރަސޫލާ صَلَّى اللهُ عَلَيْهِ وَسَلَّم ގެ ޙުކުމްފުޅުތަކަށް ރުހި ޤަބޫލުވެ، އެ ޙުކުމްފުޅުތައް އެ މީހެއްގެ އަމިއްލަ ދިރިއުޅުމުގައްޔާއި އެ މީހެއްގެ ޙަޔާތުގެ ހުރިހާ މައިދާނެއްގައި ތަންފީޒުކުރުމަށެވެ.
އިސްލާމްދީނަކީ ފުރިހަމަ ދީނެކެވެ. މުސްލިމުންގެ ތަޝްރީޢީ މަޞްދަރަކީ އިސްލާމްދީނެވެ. ދީނުގެ ޝަރީޢަތެވެ. އިސްލާމީ ޝަރީޢަތުގައި ގިނަގުނަ ޙުކުމްފުޅުތަކަކާއި ޙައްދުތަކެއް އެކިއެކި ކަންކަމަށް ކަނޑައަޅުއްވާފައި ވެއެވެ. އަދި އިސްލާމްދީނުގައި ވަކިގޮތަކަށް ކަނޑައަޅުއްވާފައި ނުވާ ކަންކަމަށް ޤާނޫނެއް ހަދާއިރު ބަލަން ޖެހޭ މަޞްދަރަކީ ވެސް އިސްލާމީ ޝަރީޢަތެވެ. އެ ޝަރީޢަތުގެ އުޞޫލުތަކާއި ޤަވާޢިދުތަކާ ޚިލާފު ނުވާ ގޮތެއްގެ މަތިންނެވެ. މަޤާޞިދުއްޝަރިއްޔާގެ ހަމަތަކަށް ރިޢާޔަތް ކުރެވި، މަޞްލަޙަތާއި މަފްސަދަތަށް ރިޢާޔަތް ކުރެވިގެން ހެދޭ ޤާނޫނުތަކަކަށް އެ ޤާނޫނުތައް ވުން ލާޒިމުވެގެންވެއެވެ.
މިއަދު އަޅުގަނޑުމެންގެ މުޖުތަމަޢުގައި މި ފިކުރުގެ ނުބައި ރޭވުމުގައި ޖެހިފައިވާ ބައެއް މީހުން ތިބުމަކީ ހިތާމަ ހުރި ކަމެކެވެ. މި ފިކުރުގެ ނުރައްކާތެރިކަމާއި އޭގެ ސަބަބުން އިސްލާމްދީނާއި އިސްލާމީ މުޖުތަމަޢަށް ކުރަމުންދާ ނޭދެވޭ އަސަރުތަކާ މެދު ވިސްނައި މި ފިކުރުގެ ނުރައްކާތެރި ވަކިތަކުން ސަލާމަތްވުމަކީ ކޮންމެ މުސްލިމެއްގެ މައްޗަށް ލާޒިމުވެގެންވާ ކަމެއްކަން ކަށަވަރެވެ.
