ރ. މަޑުއްވަރީ ދެކުނު ބަނދަރު ހެދުމުގެ މަޝްރޫއުގެ ދަށުން، އެއްގަމު ތޮށިލުމަށް ބޭނުންވާ ކޮންކުރީޓު ގާ އެތުރުމުގެ މަސައްކަތް ނިންމާލައިފިއެވެ.
މި މަސައްކަތް ކުރާ މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީ (އެމްޓީސީސީ) އިން ބުނީ، މި މަސައްކަތް ނިންމާލާފައި ވަނީ އިއްޔެގެ ވަގުތެއްގައި ކަމަށެވެ.
މި މަޝްރޫއުގެ ދަށުން 7،280 އަކަ މީޓަރުގެ ސަރަހައްދެއްގެ ނެރު ފުންކޮށް، 65،520 އަކަ މީޓަރުގެ ސަރަހައްދެއްގެ ހާބަރު ބޭސިން ފުންކުރުމަށް ހަމަޖެހިފައި ވެއެވެ. އަދި 411 މީޓަރުގެ ބޭރުތޮއްޓަކާއި 566 މީޓަރުގެ އެއްގަމުތޮއްޓެއް ލައި 135 މީޓަރުގެ ސަރަހައްދެއްގައި ރިވެޓްމެންޓް ޖަހާނެއެވެ.
މީގެ އިތުރުން 2825 އަކަ މީޓަރުގެ ސަރަހައްދެއްގައި ޕޭވްމަންޓް ހަދައި ނެރު ބައްތި އާއި މަގުމަތީ ބައްތި ހަރުކުރުމަށް ވަނީ ހަމަޖެހިފައެވެ.
އޮގަސްޓް 26، 2019 ގައި އެމްޓީސީސީއާ ހަވާލުކުރި މި މަޝްރޫއަކީ 72.66 މިލިއަން ރުފިޔާގެ މަޝްރޫއޫއެކެވެ.
