ހއ. ހޯރަފުށީ އެއާޕޯޓަށް ލިބުނު ގެއްލުންތައް މަރާމާތުކޮށް ނިންމައިފި އެވެ.
މިދިޔަ މަހުގެ 14 ވަނަ ދުވަހު ރާއްޖެއަށް ކުރި ވިއްސާރާގައި ހޯރަފުއްޓަށް ވަނީ ވަރަށް ބޮޑަށް އުދަ އަރައި ގެއްލުންތަކެއްވެފަ އެވެ. އެގޮތުން ރަށުގެ ބައެއް ގެތަކަށާއި ހެއްލްތު ސެންޓަރަށް ފެންވަދެ، އެއާޕޯޓަށްވެސް ވަނީ ގެއްލުންތަކެއް ލިބިފަ އެވެ.
އެރަށު އެއާޕޯޓަށް ލިބުނު ގެއްލުންތައް މަރާމާތު ކުރުމަށް ހަވާލުވެފައިވަނީ އެމްޓީސީސީންނެވެ.
އެމްޓީސީސީން މިއަދު ބުނީ ހޯރަފުއްޓަށް އުދައަރައިގެން އެއާޕޯޓަށް ލިބުނު ގެއްލުންތަކުގެ މަރާމާތުގެ މަސައްކަތްތައް މިދިޔަ އަންގާރަ ދުވަހު ނިމިފައިވާ ކަމަށެވެ.
ގަދަ ވައިގެ ސަބަބުން އެއާޕޯޓު ޓާމިނަލްގެ ބައެއް ދޮރުތަކުގެ ބިއްލޫރި ތަޅައިގެން ގޮސް ގެއްލުންތަކެއް ލިބުނެވެ. އަދި އެއާޕޯޓު ޓާމިނަލް އާއި ރަންވޭއަށްވެސް ލޮނާއި ވެލި އެރުމުގެ ސަބަބުން ދަތުރުތައްވެސް މެދުކަނޑާލި އެވެ.
އެމްޓީސީސީން ހޯރަފުށީ އެއާޕޯޓް ތަރައްގީ ކުރުމުގެ މަޝްރޫއުގެ މަސައްކަތް ނިންމައި، ސަރުކާރާ ހަވާލުކޮށްފައިވަނީ މިދިޔަ އަހަރުގެ ނޮވެމްބަރު މަހުގެ ހަވަނަ ދުވަހު އެވެ.
