ޕީޕީއެމް ހަނިމާދޫ ސްޓިއަރިން ކޮމެޓީންނާއި ޕީޕީއެމްގެ އެންމެހައި މެންބަރުން “ނަފުރަތުގެ އަމަލު” ބަޔާންކުރާ ބިލާއި ދެކޮޅުކަން ބަޔާންކޮށް އެ ކޮމެޓީން ބަޔާނެއް ނެރެެފިއެވެ.
މިއަދު ނެރުނު އެބަޔާނުގައި ބުނެފައިވަނީ ނަފުރަތުގެ ޢަމަލުތައް ހުއްޓުވުމުގެ ނަމުގައި ޤާނޫނު ނަންބަރު 9/2014 (ދިވެހިރާއްޖޭގެ ޤާނުނުލް ޢުޤޫބާތު) ގެ 123 ވަނަ މާއްދާގެ ފަހަތަށް 124 ވަނަ މައްދާގެ ގޮތުގައި އިތުރުކުރުމަށް ހުށައަޅާފައިވާ އިސްލާހަކީ ކަނޑައެޅިގެން އިސްލާމްދީނަށް ފާޅުގައި ފުރައްސާރަ ކުރާ ފަރާތްތަކަށް ހިތްވަރު ލިބޭގޮތަށް ޤާނޫނުން އެފަދަ ފަރާތްތަކަށް ހިމާޔަތް ހޯދައި ދިނުމަށް ފަރުމާކޮށް ހުށަހަޅާފައިވާ ބިލެއް ކަމަށެވެ.
މީގެ އިތުރުން މި ބިލުގެ ސަބަބުން ޤާނޫނު އަސާސީގެ 27 ވަނަ މާއްދާއިން ކަށަވަރު ކޮށްދީފައިވާ އިސްލާމްދީނުގެ އަސްލުތަކާއި ޚިލާފު ނުވާނެ ގޮތުގެ މަތިން ޚިޔާލު ފާޅުކުރުމުގެ މިނިވަންކަން ވަރަށް ބޮޑަށް ހަނިކުރެވިގެން ދާނެކަމަށް ގަބޫލު ކުރެވޭ ކަމަވެސް އެބަޔާނުގައި ވެއެވެ.
އެބަޔާން ނިންމާލާފައިވަނީ އެބިލް އަނބުރާ ގެންދިއުމަށް ސަރުކާރަށް ގޮވާލުމާއެކު އިސްލާހާއި ދެކޮޅަށް އަޑު އުފުލުމަށް ހަނިމާދޫ ދާއިރާގެ އިތްޒަތްތެރި މެންބަރަށާއި، ހަނިމާދޫ ކައުންސިލަށް ގޮވާލަމުންނެވެ.
