ފުނަދޫ ކައުންސިލް ގެ ފިތުރު އީދު ކަޕް 1442 ފޯރިޔާއިއެކު ފެށިގެން ފުނަދޫގައި ކުރިއަށް އެބަދެއެވެ .
މި މުބާރާތާއި ބެހޭގޮތުން ގޮށްކޮޅަށް މައުލޫމާތު ދެއްވަމުން ފުނަދޫ ކައުންސިލްގެ ރައީސް އަޙްމަދު އިބުރާހިމްފުޅު ވިދާޅުވީ ފިތުރު އީދު ގައި ކުޅެން ތާވަލުކުރި މި މުބާރާތް ލަސް ކުރަންޖެހުނީ ކޮވިޑް 19 ހާލަތު އެ އަތޮޅުގައި ގޯސްވުމުން ކަމަށެވެ. ނަމަވެސް ކޮވިޑް-19 ހާލަތު ރަނގަޅުވުމުން މި މަހު 15 ވަނަ ދުވަހު މުބާރާތް ފެށީ ކަމަށެވެ.
މި މުބާރާތް ފައްޓަވައިދެއްވީ އަތޮޅު ކައުންސިލްގެ ރައީސް މުހައްމަދު ސިހާމް އެވެ.
މެޗުފެށުމުގެ ކުރިންވަނީ ފުނަދޫގައި މިމަހު 5ވަނަ ދުވަހު ހިނގި ހިތާމަވެރި ޖެޓްސްކީ ހާދިސާގައި ނިޔާވި ބަޑީޒް އެފްސީގެ ޖާޒީ ނަންބަރު 22 ޝުނާން ގެ ހަނދާނުގައި ހަމަހިމޭން ކަމުގެ ސުކޫތެއް ގެނެސްފައެވެ. ގޮށްކޮޅަށް މައުލޫމާތު ލިބުންގޮތުގައި ޝުނާންގެ ބަދަލުގައި އިތުރުކުޅުންތެރިއަކު ޓީމަށް ނުނެގުމަށް ބަޑީޒް އެފްސީގެ މެނޭޖްމެންޓުން ވަނީނިންމާފައެވެ. އަދި މެޗުފެށުމުގެ ކުރިންނެގި ޓީމް ފޮޓޯގައިވެސް ޝުނާންގެ ޖާގަވަނީ ހުސްކޮށްބައިންދާފައެވެ.
ފުޓްސަލް މުބާރާތް ދެޖިންސަށް ހުޅުވާލައިގެން ކުރިޔަށް ގެންދާ އިރު ފިރިހެން 10 ޓީމް އަދި އަންހެން 4 ޓީމް ވާދަކުރެއެވެ.
ފިރިހެން ޑިވިޝަން ދެ ގުރޫޕަކަށް ބަހައިލައިގެން ކުޅޭ އިރު ކޮންމެ ގުރޫޕަކުން ވެސް ދެ ޓީމް ސެމީ ފައިނަލަށް ދަތުރުކުރާނެއެވެ. އަދި އެތަނުން މޮޅުވާ ދެޓީމް ފައިނަލުގައި ވާދަކުރާނެކަމަށް ކައުންސިލްގެ ރައީސް ވިދާޅުވި އެވެ.
އިތުރަށް ވާހަކަ ކުރިއަށް ގެންދަވަމުން ރައިސް ވިދާޅުވީ އަންހެން ޑިވިޝަންގައި 4 ޓީމް ހިމެނޭއިރު، ކޮންމެ ޓީމެއް ކޮންމެޓީމަކާއި ވާދަކޮށް ޕޮއިންޓް ތާވަލުގެ އެއް ވަނައާއި ދެވަނަ ފައިނަލް ކުޅޭގޮތަށެވެ.
މި މުބާރާތުގައި ވާދަ ކުރާ ޓިމުތަކަކީ
ފިރިހެން ޓީމްތައް
ގްރޫޕް އޭ
- ޒޮލޭން
- ހުއްރިއްޔާ އުތުރި
- ޕޮލިސް
- ހުއްރިއްޔާ
- ބަޑީސް
ގްރޫޕް ބީ
- ރައްޒާޤުމެން
- ގުރޫވްސްޓްރީޓް އެސް.ސީ
- ބްރެކެޓް އެފް.ސީ
- ބޭވޮޗް
- މާދަންރޭ
އަންހެން ޓީމްތައް
- ގުރޫވް ސްޓްރީޓް ގާލްސް
- ޕޮލިސް ލައިފް
- ފުނަ ކަނބާ
- ފްލެމެންކޯ އެފް.ސީ
ކަވަރ ފޮޓޯ : މުޙައްމަދު ޙަސަން (ތަރި)
