ހަނިމާދޫގައި ސަރުކާރުން ހަދަންފެށި ޓާފް ދަނޑު، އެއް އަހަރާއި ހަތަރު މަސް ފަހުން ނިންމައިލައިފިއެވެ.
ހަނީމާދޫގައި ޓާފު އަޅައިގެން ދަނޑެއް ހަދަން ފެށީ 2020 ވަނަ އަހަރުގެ ފެބްރުއަރީ 16 ވަނަ ދުވަހުއެވެ. ދަނޑު ނިމުނުކަން ސަރުކާރުން ހާމަކުރީ މިއަދުއެވެ. އެކަން ހާމަ ކުރެއްވީ ޔޫތު މިނިސްޓަރ އަހްމަދު މަހްލޫފް ކުރެއްވި ޓުވީޓެއްގައެވެ.
ޔޫތު މިނިސްޓަރ މިއަދު ކުރެއްވި ޓްވީޓްގައި ވިދާޅުވެފައި ވަނީ އެންމެން ފުޓްބޯޅަ ފޯރީގައި ޔޫރޯ ބަލަން ތިއްބައި ހދ.ހަނިމާދޫގައި ރައީސް އިބްރާހީމް މުޙައްމަދު ޞާލިހް ޤާއިމް ކޮށްދެއްވަން ވަޢުދުވެ ވަޑައިގެންނެވި ފުޓްބޯޅަ ދަނޑުގެ މަސައްކަތް ނިންމާލެވިފައިވާ ކަމަށެވެ. މިނިސްޓަރ އިތުރަށް ވިދާޅުވެފައި ވަނީ ދަނޑުވަށައި ފެންސް ޖެހުމުގެ މަސައްކަތް ކުރިން ކައުންސިލާއި ހަވާލުކުރެވިފައިވާ ކަމަށެވެ.
މިދަނޑުގެ މަސައްކަތް ނިމުނުކަން އިއުލާނުކޮށްފައިވާއިރު، ދަނޑުގެ ބައެއް ހިސާބުތަކުގައި ޓާފު އަޅާފައިވަނީ ކުދި ކުދި ޓާފުކޮޅު ކޮޅު ގުޅުވައިގެން ކަމަށްބުނެ އެކަމުގެ ކަންބޮޑުވުން ޝޯޝަލް މީޑިއާގައި ހަނިމާދޫގެ ބައެއް ޒުވާނުން ފާޅުކޮށްފައިވެއެވެ. މިކަން މިގޮތަށް އޮތްކަމުގައިވާނަމަ، މި މަސައްކަތް ބެލެހެއްޓުމުގެ ޒިންމާ އޮތް ފަރާތްތަކުން އިހުމާލުވެފައިވާކަން ޔަގީނެވެ. އަދި މި މަސައްކަތް ނިމުނޭ ކިޔާ ފަހުވެރިވެ، ޓްވީޓްކުރުން ޔޫތު މިނިސްޓަރަށް ހައްގެއްވެސް ނޫނެވެ. ސަބަބަކީ މަސައްކަތް ފުރިހަމަ ވިނަމަވެސް، މަސައްކަތުގައި ފަރުވާކުޑަކޮށް، ކަމަކަށް ކަމެއް ކުރާ އުސޫލުން ކޮށްފައިވާ ކަމަށް ވާނެތީއެވެ.
ސަރުކާރުން ރާއްޖޭގައި 100 ޓާފް ފުޓްބޯޅަ ދަނޑު ތަރައްޤީ ކުރުމަށް އަމާޒު ހިފާފައިވާއިރު، މި މަޝްރޫޢުގެ ދަށުން ބޮޑު ތިލަދުންމަތީގެ ބައެއް ރަށް ތަކުގައި މިހާރު ޓާފް ދަނޑުތައް ވަނީ އަޅާ ނިންމާފައެވެ. މިގޮތުން ހއ.ތުރާކުނު، ހއ.ދިއްދޫ، ހދ.ނެއްލައިދޫގެ ދަނޑު މިހާރު ވަނީ ނިންމައި ބޭނުން ކުރަން ފަށާފައެވެ. އަދި މީގެ އިތުރުން ތިލަދުންމަތީގެ ގިނަ ރަށްތަކެއްގެ ދަނޑުތަކުގެ މަސައްކަތް މިހާރު ވެސް އެބަ ކުރިއަށް ދާކަމަށް ސަރުކާރުން ކުރިން ހާމަކޮށްފައިވެއެވެ.
