ޔޫރޯ ފޯރީގައި ޖައްސާ ނިންމި ހަނިމާދޫ ޓާފު ދަނޑުމިއޮތީ އަމާ ބުނީތީ ފަރަށް ދާހެން ނިންމާފައި ހެެއްޔެވެ؟ ނުވަތަ ވައުދު ފުއްދީމޭ ބުނަން އިހްލާސްތެރިކަމެެއް ނެތި ނިންމައިފައި ހެއްޔެވެ؟
މި މަހުގެ 4 ވަނަ ދުވަހު ޔޫތު މިނިސްޓަރ މަހުލޫފު ކުރެވި ޓުއިޓެއްގައި ބުނެފައިވަނީ އެންމެން ފުޓްބޯޅަ ފޯރީގައި ޔޫރޯ ބަލަން ތިއްބައި ހދ.ހަނިމާދޫގައި ރައީސް އިބްރާހީމް މުޙައްމަދު ޞާލިހް ޤާއިމް ކޮށްދެއްވަން ވަޢުދުވެ ވަޑައިގެންނެވި ފުޓްބޯޅަ ދަނޑުގެ މަސައްކަތް ނިންމާލެވިފައިވާ ކަމަށެވެ.
ރަނގަޅެވެ. މަނިކުފާނުއެވެ. ރައީސް ޓެގްކުރައްވައި މެޑަލް ޖަހަން ޓްވީޓްކޮށް ބުނިހެން އެ ދަނޑު އޮތީ ނިންމައިފައެވެ. ނަމަވެސް މަނިކުފާނަށް އެތަނުގެ ފެންވަރު އެނގޭ ހެއްޔެވެ. އެނގެން ޖެހޭނެއެވެ. މަގާމާ ހަވާލުވަނީ އެ ޒިންމާ ނަންގަވާށެވެ. ނަމަވެސް އެނގޭކަމަށް ނުހައްދަވާތީ ނުވަތަ ނޭނގިދާނެތީ މިތަނުގައި ބަޔާންކޮށްލަމެވެ.
ދަނޑު އޮތީ ހަތްދުލިލީ ރަަށެއް ހެންނެވެ. ދަނޑަށް އަރައި ހިނގައިލުމުން ހީވަނީ ކުޑަ ކުދިން އަތިރިމަތީގައި ގުންފައި ޖަހާފައި ހުންނަ ހިސާބަކުން ހިނގޭ ހެންނެވެ. ދަނޑުގައި ހަދާފައިވާ ފެން ހިންދާތައް ހުރީ ދަނޑަށްވުރެ އެއް އިންޗި އުސްކޮންނެވެ. މިހެން ބުންޏަސް ބައެއް ދިމާތަކުގައި ލެވަލްކޮން އެބަހުއްޓެވެ. ދަނޑަށް ރަބަރު އަޅާފައި ހުރީ ތަންގަނޑު ގަޑަށް ފުނި ފުންޏަށޭ ބުންޏަސް ދޮގަކަށް ނުވާނެއެވެ. ދަނޑު ވަށައިގެން ހަދާފައިވާ ޕޭވްމަންޓު އޮތީ މެދު އުނުން ބިނދިފައެވެ. އެތައް ދިމާލަކުން ގަނބައިގެން ފައެވެ.
މީގެ އިތުރުން ތަނުގައި މަސްކަތް ކުރި އިރު ބޭނުން ކުރެވުނު ތަކެތީގެ ތެރެއިން ނައްތާލަން ޖެހޭ ތަކެއްޗައް ނަޒަރު ހިންގައިލާއިރު، ބޭނުން ކުރި އަންގި އޮތީ ޕޭވްމަޓް މައްޗަށް އުކައިލާފައެވެ. ކުނިތަށް ހުރީ ހަނިމާދޫ ކައުންސިލުން ކަނޑައަަލައިފ އޮންނަ ތަން ނޫން އެހެން ތަނަކަށް އުކައިލައިފައެވެ.
ދަނޑުގެ މަސައްކަތްތައް ކުރިއަށް ދިޔަ ތާރިހުތަކަށް އަވަސް ނަޒަރެއް:
ހަނިމާދޫގައި ޒަމާނީ ޓާފް ދަނޑެއް އެޅުމަށްޓަކައި 26 ނޮވެންބަރ 2020 ގައި އާރު.ކޭ އެލް ކުންފުނީގެ ހެވީ ވެހިކަލްތަކާއި މުވައްޒަފުން ހަނިމާދޫ އައިސްފައިވެއެވެ. އަދި 16 ފެބުރުއަރީ 2020 ގައި މަސައްކސތް ފެށިއެވެ. ބޭސް ހަދައި ނިމުނީ 21 އޮގަސްޓް 2020 ގައިއެވެ. އަދި ވެހިކަލްތަކާއި އެކު އެއަހަރުގެ ސެޕްޓެންބަރ މަހު އެކުންފުނިން ވަނީ ހަނިމާދޫއިން ފުރާފައެވެ.
21 ޖެނުއަރީ 2021 ގައި ދަނޑަށް ބޭނުންވާ ބައެއް ސާމާނު ގެނައެވެ. އެއީ ރަބަރެވެ. އަދި ފެބުރުއަރީ މަހު ކާޕެޓްރޯލްތަށް ގެނެވުނެވެ. އަދި 3 ޖޫން ގައި ދަނޑުގައި ކާޕެޓް އެޅުމުގެ މަސައްކަތް ކުރަން ފެށިއެވެ. އަދި މިމަހު 4 ވަނަ ދުވަހު މަސައްކަތް ވަނީ ނިމާލާފައެވެ. ދަނޑުގެ ކާޕެޓް އެޅުމުގައި ހަރަކާތްތެރިވީ ހަނިމާދޫ ޒުވާނުންނެވެ.
މަސައްކަތްތައް މޮނިޓަރކޮށް ބަލާނެ މުއައްސަސާއެއް ވެސް ނެތް؟
ރަށުގައި ހިންގައި ޕްރޮޖެކްޓްތައް ހިނގާ ނުހިނގައި ގޮތް ބެލުމުގެ ދެ ޒިންމާއެއް ކައުންސިލަށް އަރައެވެ. އެއީ ގާނޫނީ ޒިންމާއާއި ރައްޔިތުންނާއި ރަށުގެ ލާބަޔާއި މަންފާއަށް މަސައްކަތްކުރުމުގެ ޒިންމާއެވެ. އެހެން ގޮތަކަށް ބުނާނަމަ ރަށުގެ މަސްލަހަތެވެ. ނިމިގެން ދިޔަ ދައުރުގައި އަދި މިހާރުވެސް ހަނިމާދޫ ކައުންސިލުގައި އޮތީ ވެެރިކަންކުރާ އެމް.ޑީ.ޕީގެ މެޖޯރިޓީއެވެ. ކައުންސިލުން ކުރީ ކީއްބާއެވެ. މަތީގައި ބަޔާންކުރެވުނު ކަންކަން ދަނޑުން ހަމަ ނުފެނުނީތޯއެވެ.
ދެން އޮތީ ޔޫތު މިނިސްޓްރީއެވެ. ޕްރޮޖެކްޓެއް ހަވާލު މިކުރަނީ ރައްޔިތުންގެ ހައްގުގައި ބާއެވެ. ހިތުހުރި ގޮތަކަށް މަސައްކަތް ނިންމާތަން ބަލަން ތިބުމުން، ދަނޑަކީ ރައްޔިތުންނަށްޓަކައި ކޮންދިން ކަމަކަށްވުރެ، ބަޔަކަށް ލާރި ގަނޑެއް ދޭން ކުރިކަމެއް ބާއޭ ހީނުވޭ ހެެއްޔެވެ.
ޕްރޮޖެކްޓެއް ހަވާލުކުރަނީ އެގްރީމެންޓް ކުރެވިގެންނެވެ. ދަނޑު ނިންމައި ހަވާލުކުރާއިރު އެތަން އޮންނަންޖެހޭ ފެންވަރާއި ދަނޑު ހަނދަންޖެހޭ ގޮތާއި ބޭނުން ކުރަންޖެހޭނެ ތަކެތީގެ ފެންވަރު ފަދަ ކަންކަމަކީ މިފަދަ އެގްރީމެންޓެއްގައި އޮތުން އަސާސީ ކަންކަމެވެ. އޭގައި ބުނާ ފެންވަރަށް ނިންމައިފައި ނުވާނަމަ، އެކަމުގެ ފަރުވާވެސް އޭގައި ލިޔެވިފައި އޮންނަން ވާނެއެވެ. އެހެންކަމުން އަމާ ބުނީތީ ފަރަށްދާހެން ނިންމައިފައި އޮތް ދަނޑަކާއި ހަވާލުވެގެން ނުވާނެއެވެ. ކަނޑަ ކަންކަން ހައްލުކުރެވެން ވާނެއެވެ. ހަވާލުވެެއްޖެނަމަ، ޒިންމާއަށް ހިޔާނާތްތެރިވީއެވެ.
މިދަނޑަށް އެކަނި ބަލާލުމުންވެސް، މިއީ އެންމެ ގިނަ މަސްރޫޢުތައް ހިންގާ ސަރުކާރޭ، މިހާރުވެސް މިވެނި އެވެނި އަދަދަކަށް ޕްރޮޖެކްޓްތައް ނިމިއްޖޭ ބުނެ އަދި ފަޙްރުވެރިވެވޭކަށް ނެތެވެ.
