ކޮންމެ އިންސާނެއްގެ ހަޔާތަކީ ވެސް ފޮތެކެވެ. އެ ފޮތް އޭނާއަށް ޤިޔާމަތްދުވަހުން ފެނިގެން ދާނެއެވެ. އޭގައި، އޭނާ ކުރި ހުރިހާ ކަމެއް ވެސް ލިޔެވިގެން ވާނެއެވެ. އަދި، އޭނާއަށް އަމުރު ކުރެވޭނެއެވެ. ކިޔާށެވެ! މިއޮތީ ތިބާގެ ފޮތެވެ. މިއަދު ތިބާގެ މައްޗަށް ހިސާބު ކުރާނެ މީހަކަށް ތިބާގެ އަމިއްލަ ނަފްސު ފުދެއެވެ.
މާތް ﷲ سبحانه وتعالى ވަޙީކުރައްވާފައިވެއެވެ. ﴿وَكُلَّ إِنسَانٍ أَلْزَمْنَاهُ طَائِرَهُ فِي عُنُقِهِ ۖ وَنُخْرِجُ لَهُ يَوْمَ الْقِيَامَةِ كِتَابًا يَلْقَاهُ مَنشُورًا(١٣) اقْرَأْ كِتَابَكَ كَفَىٰ بِنَفْسِكَ الْيَوْمَ عَلَيْكَ حَسِيبًا(١٤)﴾ (الإسراء) މާނައީ: “އަދި ކޮންމެ އިންސާނަކުމެ، އޭނާ ކުޅަ ޢަމަލު، އޭނާގެ ކަރުގައި ތިމަން ﷲ އެޅުއްވީމެވެ. އަދި ޤިޔާމަތްދުވަހުން، ތިމަން ﷲ އެ މީހަކަށް ފޮތެއް ނެރުއްވާ ހުށީމެވެ. އެ ފޮތް ނިއުޅައިލެވިގެންވާ ހާލުގައި، އޭނާ ދެކޭނެތެވެ. (އަދި އަންގަވާނެތެވެ.) ތިބާގެ ފޮތް ތިބާ ކިޔާށެވެ! މިއަދު ތިބާގެ މައްޗަށް ހިސާބު ކުރާ މީހަކަށް، ތިބާގެ އަމިއްލަ ނަފްސު ފުދެއެވެ.”
ތިބާގެ ފޮތަކީ ރީތި ވާހަކަތަކެއް އޭގައި އެކުލެވިގެންވާ ފޮތެއް ކަމުގައި ހެދޭތޯ މަސައްކަތްކުރާށެވެ. ހެޔޮ ޢަމަލެއް ނޫނީ އޭގައި ނުލިޔާށެވެ. މާތް ﷲ އެއްކައުވަންތަކޮށް، ހަޔާތުގެ މަޤްޞަދަކީ އެކަލާނގެ ރުއްސެވުން ހޯދުންކަމުގައި ހަދާށެވެ. ތިބާގެ ދިރުމާއި މަރުވުން، އެއީ، އެ އިލާހަށް ޓަކައި ވާ ކަމެއް ކަމުގައި ހަދާށެވެ. މައިންބަފައިންނާއި، ތިމާގެ މީހުންނަށް ހެޔޮ ފޯރުވާށެވެ. ނިކަމެތިންނާއި، މިސްކީނުންނާއި، ކުޑަކުދިންނާއި މުސްކުޅިންނަށް އޯގާތެރިވާށެވެ. ތިބާގެ ހަޔާތަކީ ކެތްތެރިކަމާއި، ޤުރުބާނީ އާއި ޝުކުރުން ފުރިގެންވާ ހަޔާތެއް ކަމުގައި ހަދާށެވެ. އިސާހިތަކު މި ވަގުތު ނިމިދާނެއެވެ. ދެން ފެންނާނީ އެ ފޮތެވެ. އެއީ އުފާވެރިކަން ތިބާއަށް ލިބިގެން ދާނެ ފޮތެއް ކަމުގައި ހަދާށެވެ. އެހެން މީހުންނަށް ދައްކައި، މި އޮތީ އަހުރެންގެ ފޮތޭ، މި ފޮތް ކިޔައިބަލާށޭ ބުނެވޭ ކަހަލަ ފޮތަކަށް ހަދާށެވެ. ކަނާތުން ލިބޭ ފޮތަކަށް ހަދާށެވެ.
މާތް ﷲ ވަޙީކުރައްވާފައިވެއެވެ. ﴿فَأَمَّا مَنْ أُوتِيَ كِتَابَهُ بِيَمِينِهِ فَيَقُولُ هَاؤُمُ اقْرَءُوا كِتَابِيَهْ(١٩) إِنِّي ظَنَنتُ أَنِّي مُلَاقٍ حِسَابِيَهْ(٢٠) فَهُوَ فِي عِيشَةٍ رَّاضِيَةٍ(٢١) فِي جَنَّةٍ عَالِيَةٍ(٢٢) قُطُوفُهَا دَانِيَةٌ(٢٣) كُلُوا وَاشْرَبُوا هَنِيئًا بِمَا أَسْلَفْتُمْ فِي الْأَيَّامِ الْخَالِيَةِ(٢٤)﴾ (الحاقة) މާނައީ: “ފަހެ، އެ މީހެއްގެ ފޮތް، އެ މީހެއްގެ ކަނާތަށް ލިބުނު މީހާ ދަންނާށެވެ! ފަހެ، އެ މީހާ ބުނާނެތެވެ. މި އޮތީއެވެ. ތިޔަބައިމީހުން ތިމަންގެ ފޮތް ކިޔައިބަލާށެވެ! ހަމަކަށަވަރުން، ތިމަންގެ ހިސާބާ ކުރިމަތިލާން ޖެހޭނެކަން ތިމަންނާއަށް ޔަޤީންވިއެވެ. ފަހެ، އޭނާ ވާހުށީ، ރުހިގެންވާ ދިރިއުޅުމެއްގައެވެ. މަތިވެރިވެގެންވާ ސުވަރުގެޔެއްގައެވެ. އެތާނގެ މޭވާތައް ކައިރިވެގެންވެއެވެ. (އަންގަވާނެތެވެ.) އަރާމު ލިބެނިވި ގޮތުގައި، ތިޔަބައިމީހުން ކައިބޮއި އުޅޭށެވެ! ދުނިޔޭގައި ތިޔަބައިމީހުން ހޭދަކުރި ދުވަސްތަކުގައި ތިޔަބައިމީހުން ކުރި ހެޔޮ ޢަމަލުތަކުގެ ސަވާބެއްގެ ގޮތުންނެވެ.”
