އއ.ބޮޑުފޮޅުދޫ އާރުބީޖީ ސްޕޯރޓްސް ކުލަބުން، އެކުލަބުން ކުރަމުން އައި އިޖްތިމާއީ މަސައްކަތްތައް ނިންމާލުމަށްފަހު އެކުލަބުން ރާވާ އިންތިޒާމް ކުރާ ކުޅިވަރު ހަރަކާތްތައް މެކުހަށް ޖަހައިފިއެވެ.
މިކަމާއި ގުޅިގެން މައުލުމާތު ހިއްސާކުރަމުން އެކުލަބުގެ ރައީސް އިބްރާހިމް ނަސީމް ވިދާޅުވީ އެކުލަބުން އެންމެ އިސްކަމެއްދީގެން ކުރަމުން އައި މަސައްކަތަކީ ބޭންކް އޮފް މޯލްޑިވްސްގެ އެހީތެރިކަމާއި އެކު ބިނާކުރެވުނު ޒަމާނީ މަސްކަނޑާއަށީގެ މަސައްކަތްކަމަށާއި، އެމަސައްކަތް ނިންމާ ރަސްމީކޮށް ހުޅުވުމަށްފަހު މިހާރު ކުލަބުގެ ކުރިއަށް ހުރި ހަރަކާތްތައް ހާއްސަކޮށްފައިމިވަނީ ކުޅިވަރަށްކަމަށެވެ.
އެގޮތުން ކުލަބުގެ މެމްބަރުންނަށް ހާއްސަކޮށް ކުރިއަށް އޮތްދުވަސްތަކުގައި އަންހެން ހޭންޑްބޯލް، ވޮލީ އަދި ފިރިހެން ވޮލީއާއި ފުޓްސަލް މެޗްތައް ކުޅުމަށް ހަމަޖެހިފައިވާ ކަމަށް އިބްރާހިމް ނަސީމް ވިދާޅުވިއެވެ.
2021 ވަނައަހަރު އޮގަސްޓް 13 ވީ ހުކުރުދުވަހަކީ ބޮޑުފޮޅުދޫގެ ތާރީޚްގައި އާރުބީޖީ ސްޕޯރޓްސް ކުލަބުގެ ނަން ރަންއަކުރުން ފަވާލެވިގެން ދިޔަ ދުވަހެއްކަމަށް ޤަބޫލްކުރާކަމަށާއި ރަށަށްވެސް ރީތިނަމެއް ހޯދައިދެވިގެން ދިޔަ ދުވަހެއްކަމަށް ގަބޫލުކުރާކަމަށް ރައިސް ވިދާޅުވިއެވެ.
އެދުވަހަކީ އާރުބީޖީ ސްޕޯރޓްސް ކުލަބުގެ ދައުވަތަކަށް މާލޭގައި ހަރަކާތްތެރިވާ ސްޕޯރޓްސް ކުލަބެއްކަމަށްވާ ”ރެޑްހޯރކްސް” ސްޕޯރޓްސް ކުލަބުގެ ހޭންޑްބޯލް ޓީމް ބޮޑުފޮޅުދޫއަށް ޒިޔާރަތްކޮށް އާރުބީޖީގެ އަންހެން ހޭންޑްބޯލް ޓީމާއިއެކު ރަހްމަތްތެރިކަމުގެ 2 މެޗް ކުޅުނު ދުވަހެވެ
މިމެޗްގެ ޝަރަފްވެރި ކޮށްދެވީ ބޮޑުފޮޅުދޫ ކައުންސިލްގެ ރައީސް އެވެ. އަދި މިމެޗް ފައްޓަވައި ދެއްވާފައިވަނީ އަންހެނުންގެ ތަރައްޤީއަށް މަސައްކަތްކުރާ ކޮމެޓީގެ 5 މެމްބަރުންނެވެ.
މި މެޗާއި ބެހޭގޮތުން އާރުބީޖީއިން ވިދާޅުވީ މީ ލެވެލްގެ ގޮތުން ބެލިނަމަވެސް ހުނަރުވެރި މޮޅެތި ގިނަ ކުޅުންތެރިންތަކެށް ތިބި ޓީމެއް ކަމަށާއި ރެޑްހޯރކްސް އިން މިފުރަސަތު ދެއްވިކަމަށްޓަކައި އާރުބީޖީގެ ކުޅުންތެރިންނަށް އިތުރު ތަޖްރިބާތަކެ ލިބި ގިނަކަންކަން ދަސްވެގެން ދިޔަކަމަށެވެ.
2021 އޮގަސްޓް 13 ވީ ހުކުރުދުވަހުގެ ހަވީރު ކުޅެވުނު ފުރަތަމަ މެޗްގައި އާރުބީޖީ ހޭންޑްބޯލްޓީމްގެ ފަރާތުން މޮޅުކުޅުމެއް ފެނިގެންދިޔައިރު މެޗުން މޮޅުވެފައިވަނީ 9-11 ގެ ނަތީޖާ އަކުން އާރުބީޖީ ހޭންޑްބޯލް ޓީމެވެ. މި މެޗްގައި ރެޑްހޯރކްސް ޓީމުން ގޯލާއި އަމާޒްކުރި ގިނަ ހަމަލާތަކެށްގެ ހުރަހަކަށްވެ ބެލުންތެރިން ސިއްސުވާލި އެޓީމްގެ ގޯލްކީޕާރ އައިޝަތު ވިރާސާ ވަނީ ތަފާތު މޮޅުކުޅުމެއްދައްކާފައެވެ.
އާރުބީޖީން މައުލޫމާތު ދިންގޮތުގައި މީ ކާމިޔާބީއަކީ އެކުލަބުން ހޭންޑްބޯލްގައި ހުނަރުވެރި ކުޅުންތެރިންތަކެއް އުފެއްދުމަށް ކުރަމުން އައި މަސައްކަތަށް ލިބުނު ވަރަށް ބޮޑު ކުރިއެރުމެއްކަމަށާއި، މީ އެކުލަބުޓީމްގެ ހެޑް ކޯޗް އާމިރު އިބްރާހިމްގެ ބުރަމަސައްކަތުގެ ނަތީޖާ ކަމަށާއި، ކުލަބުން ކޯޗަށް ވަރަށް ހާއްސަ ޝުކުރެއް ދަންނަވާކަމަށް އެކުލަބުގެ ރައީސް ވިދާޅުވިއެވެ.
މީ އާރުބީޖީ ރަށާއި އަތޮޅު ހުރަސްކޮށް މިވަރުގެ ކާމިޔާބެއް ހޯދި އަންހެން ފުރަތަމަ މެޗްކަމަށްވުމާއިއެކު އިތުރަށް މިފަދަ ފުރުސަތުތައް ހޯދައިދޭނެ ކަމުގެ ޔަޤީންކަން ޓީމްތަކަށް ރައީސް ދެއްވިއެވެ.
ރެޑްހޯރކްސް ހޭންޑްބޯލްޓީމާއި އެކު ކުޅެވުނު 2 ވަނަ މެޗް 14 އޮގަސްޓް ވީ ހޮނިހިރު ދުވަހުގެ ހެނދުނު 6:30 ގައި ކުޅެވިގެން ދިޔައިރު މިމެޗްވެސް ވާދަވެރި ކުޅުމަކަށް ފަހު އާރުބީޖީން ވަނީ 9- 15 އިން ކާމިޔާބުކޮށްފައެވެ.
އެކުލަބުން ،މައުލޫމާތު ދިންގޮތުގައި މިހާތަނަށް އެކުވެރިކަމުގެ ހޭންޑްބޯލް މެޗެށް ބެލުމަށް އެންމެގިނަ މީހުން ހާޒިރުވި މެޗަކީ މިއެވެ. މި މެޗު ބެލުމަށް ރަށްކައިރީގެ ބައެއްރަށްރަށުންވެސް ގިނަ އަދަދެއްގެ ބަޔަކު ރަށަށް ޒިޔާރަތް ކުރިއެވެ.
އާރުބީޖީގެ ދައުވަތަށް އެރަށަށް ޒިޔާރަތް ކުރި ރެޑްހޯރކްސް ސްޕޯރޓްސް ކުލަބުން ވަނީ އާރުބީޖީއަށް ހޭންޑްބޯލް އާއި އެކުލަބު ރަމްޒުކޮށްދޭ ޖޯޒީއެއްށް ހަދިޔާކޮށްފައެވެ.
ރެޑްހޯރކްސް މި ކުލަބަކީ ހޭންޑްބޯލްގައި ނެޝަނަލްލެވަލްގައި ކުޅޭ ކުޅުންތެރިންތަކެށް ތިބި ރަގަޅު މެނޭޖްމަންޓަކާއި، ތަޖްރިބާހުރި ކޯޗެއް ހުރި ކުލަބެކެވެ.
އަދި މި ކުލަބަކީ މާލޭގައި ގިނަ ކުޅުންތެރިންތަކަކަށް ޓްރެއިނިން ޕްރޮގްރާމްތަކެށް ހިންގާ މުޅި ރާއްޖޭގައި ހޭންޑްބޯލް ކުރިއަރުވާ ތަރަށްޤީކުރުމަށް މަސައްކަތްކުރާ ކުލަބެކެވެ.
ރެޑްހޯރކްސްގެ މިދަތުރުގެ ތަޖްރިބާ ހިއްސާ ކުރައްވަމުން އެކުލަބުގެ ރައީސް ( ދޮންބެ) ވިދާޅުވީ މީ އެކުލަބުން ހޭންޑްބޯލް ޓީމްގޮވައިގެން ރާއްޖޭގެ ރަށަކަށް ކުރި މިފަދަ ފުރަތަމަ ދަތުރު ކަމަށާއި އާރުބީޖީން އަދާކުރެއްވި ފުރިހަމަ މެހެމާންދާރީއަށް ޝުކުރު އަދާކުރަށްވާކަމަށާއި، މިހައި ފުރިހަމަކޮށް ކަންކަން އިންތިޒާމްކޮށްފައިވާ ދަތުރެއް އަދި ނުކުރައްވާކަމަށެވެ. އެކަމަށްޓަކައި ކުލަބުގެ ހިންގާކޮމެޓީއަށް ޝުކުރުއަދާކުރައްވާފައިވެއެވެ.
އާރުބީޖީ އިންވަނީ ވަރަށް ހާއްސަ ބާބަކިއު ޑިނާރނައިޓްއެއް އެޓީމަށް ދީފައެވެ. އަދި އާރުބީޖީ ހިންގާ ކޮމިޓީއާއި އެކު ބޭއްވުނު ބައްދަލުވުމުގައި، އާރުބީޖީ އަށް ހޭންޑްބޯލް ކުރިއެރުވުމަށް ގިނަ ފުރަސަތުތަކެއް ހޯދައިދިނުމަށް އެހީތެރިވެދޭނެކަމަށާއި، ހޭންޑްބޯލް ރެފްރީން ތަމްރީން ކުރުމުގައި އެސޯސިއޭޝަނުންވެސް އެހީތެރިކަން ހޯދާއި ދިނުމަށް މަސައްކަތް ކޮށްދެއްވާނެކަމަށް ވިދާޅުވެއެވެ.
ރެޑްހޯރކްސް ހޭންޑްބޯލްޓީމްގެ ކޯޗް އަލީ ސޮފީހު ވަނީ އާރުބީޖީ ސްޕޯރޓްސް ކުލަބުން ހޭންޑްބޯލް ކުޅުންތެރިން އުފެއްދުމަށް ކުރާ މަސައްކަތަށް ޝުކުރުއަދާކޮށް ޓީމްދެއްކި މޮޅު ކުޅުމަށް ތައުރީފްކުރަށްވާފައެވެ.
އާރުބީޖީ ސްޕޯރޓްސް ކުލަބުގެ ރައީސް އިބްރާހިމް ނަސީމް ވިދާޅުވީ އާރުބީޖީ އަކީ ކުޅިވަރު ކުރިއަރުވާ ކުޅުންތެރިން އުފެއްދުމަށް މަސައްކަތް ކުރާ ކުލަބެއްކަމަށް ވުމާއި އެކު ކުލަބުން ހިންގާ ބައެއް ޓްރެއިނިންގް ޕްރޮގްރާމްތަކާއި، ޕްރެކްޓިސްތަކުގައި ބައިވެރިވުމުގެ ފުރަސަތު ރަށުގެ ހުރިހާ ކުޅުންތެރިންނަށް ހުޅުވާލާނެކަމަށްބުނެފައެވެ.
