ޖަޕާނު ސަރުކާރުން ރާއްޖެއަށް އެސްޓްރަޒެނެކާ ވެކްސިންގެ 112،000 ޑޯޒު ހަދިޔާކޮށްފި އެވެ.
ވެކްސިނުގެ ހަމަހަމަކަން ގާއިމުކުރުމަށް ދުނިޔޭގެ ސިއްހަތު ޖަމިއްޔާ (ޑަބްލިޔުއެޗްއޯ) އިން އުފައްދާފައިވާ ”ކޮވެކްސް“ ފެސިލިޓީ މެދުވެރިކޮށް ޖަޕާނުން ރާއްޖެއަށް ވެކްސިން ހަދިޔާކޮށްފައި ވަނީ އެ ގައުމުގެ ”ލާސްޓް ވަން މައިލް“ ޝިޔާރުގެ ދަށުންނެވެ.
ވެކްސިން ޝިޕްމަންޓް ރަމްޒީކޮށް ދިވެހި ސަރުކާރާ ހަވާލުކޮށްފައި ވަނީ ފޮރިން މިނިސްޓްރީގައި މިއަދު ބޭއްވި ރަސްމިއްޔާތެއްގަ އެވެ. ދިވެހި ސަރުކާރުގެ ފަރާތުން ވެކްސިނާ ހަވާލުވެވަޑައިގަތީ ހެލްތު މިނިސްޓަރު އަހުމަދު ނަސީމެވެ.
އެ ރަސްމިއްޔާތުގައި ވާހަކަ ދައްކަވަމުން މިނިސްޓަރު ނަސީމު ވަނީ ކޮވިޑުގެ ބަލިމަޑުކަމުގެ ތެރޭގައި ޖަޕާނު ސަރުކާރުން ރާއްޖެއަށް ވެދީފައިވާ އެހީތެރިކަން ފާހަގަކުރައްވައި، ޝުކުރު އަދާކުރައްވައިފަ އެވެ. އެގޮތުން މީގެ ކުރިން ޖަޕާނުން ރާއްޖެއަށް ފޯރުކޮށްދިން މެޑިކަލް އާލާތްތަކާއި ސިއްހީ އެކި ސާމާނާއި އެހެނިހެން އެހީތައް ފާހަގަކުރެއްވި އެވެ.
އޭގެ އިތުރުން ޖަޕާނުން ފޯރުކޮށްދިން ވެކްސިންގެ ސަބަބުން ރާއްޖޭގެ ވެކްސިން ޖެހޭ އާބާދީގެ 90 ޕަސަންޓު މީހުންނަށް ވެކްސިން ދިނުމަށް ސަރުކާރުން ހިފާފައިވާ އަމާޒަށް ވާސިލުވުމަށް އިތުރަށް ފަސޭހަވެގެންދާނެ ކަމަށް މިނިސްޓަރު ވިދާޅުވި އެވެ.
މީގެ ކުރިންވެސް ތިން ފަހަރެއްގެ މަތިން ކޮވެކްސް ފެސިލިޓީ މެދުވެރިކޮށް ރާއްޖެއަށް ވެކްސިން ލިބިފައިވެ އެވެ. އެގޮތުން މި މަހުގެ ކުރީކޮޅު އެމެރިކާއިން ވަނީ ރާއްޖެއަށް ފައިޒާ ވެކްސިންގެ 128،700 ޑޯޒު ހަދިޔާކޮށްފަ އެވެ.
