ހަނިމާދޫ އެގްރިކަލްޗަރ ސެންޓަރ އެއްކޮށް ނަގާނެކަމަށް މިނިސްޓަރ ޑރ ހުސެއިން ރަޝީދު ހަސަން ވިދާޅުވެއްޖެއެވެ. މިނިސްޓަރ މިހެން ވިދާޅުވީ މިއަދު ހަނިމާދޫ ކައުންސިލާ ބައްދަލުކޮށް ވާހަކަ ދައްކަވަމުންނެވެ.
މިބައްދަލުވުމުގެ މައުލޫމާތު ދެއްވަމުން ހަނިމާދޫ ކައުންސިލްގެ މެންބަރ އަލީ ވިދާޅުވީ 2006 ވަނަ އަހަރުން ފެށިގެން ހަނިމާދޫ އެގްރިކަލްޗަރ ސެންޓަރަށް އިތުރުކޮށްފައިވާ ބިމުގައި އެއްވެސް ކަމެއް ނުކުރާ ވާހަކައާއި ރައްޔިތުންނަށް ބޭނުން ކުރެވޭގޮތް ހެދުމަށް ނުވަތަ ހޮސްޕިޓަލް އެޅުމަށް އެތަން ނެގުމަށް ރައްޔިތުން ބޭނުން ވާހަކަ މިނިސްޓަރަށް ދެންނެވިކަމަށެވެ.
” އަޅުގަނޑު އެބިމުގެ ވާހަކަ ބުނީމަ ވަރަށް ރުންކުރުކޮށް މިނިސްޓަރ ބުނީ އެބިން ނަގަން ރައްޔިތުން ބޭނުން ވާނަމަ މުޅިތަން ނަގާ އެހެން ރަށަކަށް ބަދަލު ކުރާނެކަމަށް.” މެންބަރު އަލީ ވިދާޅުވިއެވެ.
މިކަމުގެ މައުލޫމަތު ހޯދާލުމަށް ކައުންސިލްގެ ރައީސް ޢަބްދުއް ސައްތާރު ހަސަނަށް ގުޅާލުމުން ވިދާޅުވީ ހަނިމާދޫ އެގްރިކަލްޗަރ ސެންޓަރަށް އިތުރުކޮށް ބޭނުންނުކޮށް އޮތް ބިން އައު ހޮސްޕިޓަލު އެޅުމަށް ނަގާ ގޮތަށް ރައީސް އިބްރާހިމް މުހައްމަދު ސޯލިހު ހަނިމާދޫއަށް ކުރެއްވި ދަތުރުފުޅުގައި ވާހަކަ ދެކެވި މަޝްވަރާ ކުރެވުނު ކަމަށެވެ. އަދި އެބިން ނަގާނަމަ ހަނިމާދޫ އެގްރިކަލްޗަރ ސެންޓަރ އެއްކޮށް ނަގާނެކަމަށް މިނިސްޓަރ ޑރ ހުސެއިން ރަޝީދު ހަސަން މިއަދުގެ ބައްދަލުވުމުގައި ވިދާޅުވިކަމަށެވެ.
އިތުރަށް ވާހަކަ ކުރިއަށް ގެންދަވަމުން ސައްތާރު ވިދާޅުވީ 2006 ވަނަ އަހަރުން ފެށިގެން ބިން ދީފައި އޮތްއިރު އެތަނުގައި އެއްވެސް ކަމެއް ކޮށްފައި ނުވާކަމަށެވެ. އަދި މިއަދުގެ ބައްދަލުވުމުގައި އެތަނުގައި މިނިސްޓްރީން ކުރަން އޮޮތް ކަމެއްގެ ގޮތުގައި ބުނީ 2 އަހަރުން ފޯދޭ ރުއްތަކެއް ހައްދާ ރުކުގެ އާ ޖީލެއް ބިނާކުރުންކަމަށް މިނިސްޓަރ ވިދާޅުވިކަމަށް ސައްތާރު ވިދާޅުވިއެވެ.
2006 ވަނަ އަހަރުން ފެށިގެން ހަނިމާދޫ އެގްރިކަލްޗަރ ސެންޓަރަށް އިތުރުކޮށްދީ އެއްވެސް ކަމެއްނުކޮށް 1500 އަކަފޫޓެއްހާ ތަން އޮވެއެވެ.
