އިންޑިއާ އިން ފަންޑުކޮށްގެން ކުރިއަށް ގެންދިޔަ، ނ.ޅޮހި އަދި ރ. ކިނޮޅަހު ކްލާސްރޫމް ޕްރޮޖެކްޓް ނިމިއްޖެއެވެ.
މިނިސްޓްރީ އޮފް ހޯމްއެފެއާޒްގައި މިއަދު ނޫސްވެރިންނަށް ބޭއްވި ބައްދަލުވުމުގައި، އެޑިޔުކޭޝަން މިނިސްޓަރު ޑރ. އައިޝަތު އަލީ އޮންލައިންކޮށް ބައިވެރިވެވަޑައިގެން ވިދާޅުވި ގޮތުގައި، މި ޕްރޮޖެކްޓަށް ޖުމުލަ 118 މިލިއަން ދިވެހި ރުފިޔާ ހަރަދުވިއިރު، 106 މިލިއަން ރުފިޔާ ވަނީ އިންޑިއާ ސަރުކާރުން ފަންޑުކޮށްފައެވެ.
މި ބައްދަލުވުމުގައި އެޑިޔުކޭޝަން މިނިސްޓަރު އައިޝަތު އަލީ، އާއި ފޮރިން ސެކްރެޓަރީ އަބްދުލް ޣަފޫރު މުހައްމަދު، ގެ އިތުރުން އިންޑިއާއިން ރާއްޖެއަށް ކަނޑައަޅާފައި ހުންނަވާ ސަފީރު ސަންޖޭ ސުދީރު ވަނީ ބައިވެވަޑައިގެންނެވި އެވެ.
ފޮރިން ސެކްރެޓަރީ އަބްދުލް ޣަފޫރު ވިދާޅުވީ ރ. ކިނޮޅަހާއި ނ. ޅޮހީ ކްލާސްރޫމް ޕްރޮޖެކްޓް ނިމި، އެ ދެ ސްކޫލްގެ ކިޔެވުން އެއް ދަންފަޅިއަކަށް ބަދަލުވުން އެއީ ވަރަށް ބޮޑު ލުއިތަކެއް ލިބިގެންދާނެ ކަމެއް ކަމުގައެވެ. އެގޮތުން ސްކޫލުގެ އިތުރު ހަރަކާތްތައް ހިންގުމަށާއި އެޑްވާންސް ޓެކްނޮލޮޖީގެ އެހީގައި ކިޔަވައިދިނުމުގެ އިތުރުން ތަފާތު ގިންތީގެ ދަރިވަރުންނަށް އުނގަންނައި ދިނުމުގައި ލުއިފަސޭހަވެގެން ދާނެ ކަމަށެވެ.
