ނ.މާފަރުގައި ގާއިމުކޮށްފައިވާ ޕޮލިސް ސްޓޭޝަން ރަސްމީކޮށް ހުޅުވައިފިއެވެ.
މާފަރު ޕޮލިސް ސްޓޭޝަން ރަސްމީކޮށް ހުޅުއްވައިދެއްވީ، ހޯމަ ދުވަހުގެރޭ މާފަރުގައި ބޭއްވި ރަސްމިއްޔާތުގައި ހޯމް މިނިސްޓަރު އިމްރާނާއި، ކޮމިޝަނަރ އޮފް ޕޮލިސް މުޙައްމަދު ޙަމީދެވެ.
މާފަރު ޕޮލިސް ސްޓޭޝަން ހުޅުއްވައިދެއްވުމަށްފަހު، އެ ސްޓޭޝަންގައި ގައުމީ ދިދަ ނަންގަވައި ދެއްވީ މިނިސްޓަރު އިމްރާނެވެ. ހަމައެހެންމެ ދިވެހި ފުލުހުންގެ ޚިދުމަތުގެ ދިދަ ނަންގަވައިދެއްވީ ކޮމިޝަނަރ އޮފް ޕޮލިސް މުޙައްމަދު ޙަމީދެވެ.
ހަމައެހެންމެ އެ ދެ ބޭފުޅުން ވަނީ ޕޮލިސް ސްޓޭޝަން ބައްލަވައިލައްވާފައެވެ.
ރޭގެ ރަސްމިއްޔާތުގައި ޙަމީދު ދެއްކެވި ވާހަކައިގައި ވަނީ، މާފަރު ޕޮލިސް ސްޓޭޝަން ހުޅުވުމާއި ގުޅިގެން އެ އަތޮޅު މަނަދޫން ފުލުހުން ހާޒިރުވެގެން، މާފަރަށް ފުލުހުން ޚިދުމަތް ފޯރުކޮށްދެމުން އައި އައުމަށް ނިމުމެއް ގެނެވިފައިވާކަން ފާހަގަކުރައްވާފައެވެ.
ހަމައެހެންމެ މާފަރަކީ އިންޓަނޭޝަނަލް އެއާޕޯޓެއް އޮތް ރަށަކަށްވާތީ، އަތޮޅުގައި ލޯކަލް ޓުއަރިޒަމް ފުޅާވުމުގެ ފުރުސަތު އޮތް ކަމަށާއި، އޭގެ ސަބަބުން ޓެކްނޮލޮޖީއާއި، ދިރިއުޅުމުގެ ފެންވަރަށް ބަދަލުއަންނާނެކަން ވެސް ފާހަގަކުރެއްވިއެވެ. އެ ގޮތުން އެ ބަދަލުތަކާއެކު ކުށްކުރާ ފަރާތްތައް، ކުށްތަކަށް އަރައިގަންނަ ގޮތްތައް މިއަދު މި އަންނަނީ ބަދަލުވަމުން ކަމުގައި ވެސް ފާހަގަކުރެއްވިއެވެ.
