އއ.ބޮޑުފޮޅުދޫ އާރުބީޖީ ސްޕޯރޓްސް ކުލަބާއި ޕޮލިސްކުލަބުގެ ޖޫނިއަރ ވޮލީޓީމް އާއި ދެމެދު އެކުވެރިކަމުގެ ވޮލީ މެޗެއްކުޅެފިއެވެ.
އެކުލަބުގެ ރައީސް އިބްރާހިމް ނަސީމް ގޮށްކޮޅަށް މައުލޫމާތު ހިއްސާކުރައްވަމުން ވިދާޅުވީ މިމެޗަކީ އެކުލަބުގެ ދައުވަތަކަށް އއ.އަތޮޅުކޮމާންޑަރގެ އެހީތެރިކަމާއި އެކު ހަމަޖެހިގެން ދިޔަ މެޗެއްކަމަށާއި، މީ އާރުބީޖީ ސްޕޯރޓްސް ކުލަބުން ކުރިއަށް ގެންދާ ކުޅިވަރު ހަރަކާތްތަކަށް ލިބިގެންދިޔަ ރަގަޅު ފުރަސަތެއްކަމަށެވެ. އެގޮތުން ކުލަބުގެ ފިރިހެން ވޮލީޓީމަށް އިތުރު ތަޖުރިބާތަކެއް މިމެޗުން ލިބިގެން ދިޔަކަމަށާއި ވޮލީގައި އިތުރަށް ކުރިއަށް ދިއުމަށް ލިބުނު ހިތްވަރެއްކަމަށެވެ.
މިމެޗް ކުޅެފައިވަނީ މިމަހުގެ 8 ވީ ހުކުރުދުވަހުގެ ރޭ 21:30 ގައި ބޮޑުފޮޅޫދޫ ވޮލީކޯޓްގައެވެ. މެޗްގެ ޝަރަފްވެރި މެހެމާނެއްގެ ގޮތުގައި ބޮޑުފޮޅުދޫ ކައުންސިލްގެ ރައީސް ޝުޖާއު އާދަމް ވަނީ ބައިވެރިވެފައެވެ. އަދި އަތޮޅު ކޮމާންޑަރ ގެ އިތުރުން ޕޮލިސްކުލަބުގެ ބައެއް އިސް އޮފިސަރުން ވަނީ ބައިވެރިވެފައެވެ.
ފޯރިގަދަ ކުޅުމެއް ފެނިގެންދިޔަ މިމެޗްގައި ސެޓުތަށް ނިމިގެންގޮސްފައިވަނީ ވާދަވެރި ކޮށެވެ. އެގޮތުން ފުރަތަމަ ސެޓް 25-17 އާރުބީޖީ ވަނީ ކާމިޔާބުކޮށްފައެވެ. ދެވަނަ ސެޓް ޕޮލިސްޓީމް 25-22 އިން ކާމިޔާބު ކޮއްފައިވާއިރު 3 ވަނަ ސެޓް އާރުބީޖީން ވަނީ 25-20 ކާމިޔާބުކޮށްްފައެވެ. މެޗްގެ ހަތަރުވަނަ ސެޓް ޕޮލިސް ޖޫނިއާރޓީމް ކާމިޔާބުކޮށް 2 ސެޓް 2 ސެޓުން އެއްވަރުވެ ޓައީބްރޭކް ސެޓެއްކުޅެ އާރުބީޖީ ޓީމުން ވަނީ 15-10 ސެޓްކާމިޔާބުކޮށް މެޗު ކާމިޔަބު ކޮށްފައެވެ.
މިމެޗުގައި އާރުބީޖީސްޕޯރޓްސް ކުލަބު ޓީމްގެ ޖޯޒީނަންބަރ 11 ހަސަން ނާފިއު ވަނީ ގިނަ ހަމަލާތަކެއް ޕޮލިސްޓީމްގެ ކޮޅަށް ފޮނުވާލާ މޮޅުކޮޅުމެއްދައްކާފައެވެ.
މިމެޗް ނިންމުމަށްފަހު ޕޮލިސް ކުލަބުގެ ފަރާތުން އާރުބީޖީ ސްޕޯރޓްސް ކުލަބަށް ކުޅިވަރުގެ ބައެއްސާމާނު ވަނީ ހަދިޔާކުރައްވާފައެވެ.
އެގޮތުން މި ތަކެއްޗާއި ހަވާލުވެފައިވަނީ އާރުބީޖީ ސްޕޯރޓްސް ކުލަބުގެ ރައީސް އިބްރާހިމް ނަސީމް އާއި ކުލަބުގެ ނައިބް ރައީސް އަދި ވޮލީޓީމްގެ ކެޕްޓަން ހަސަން ނާފިއު ( ނާއްޕެ ) އެވެ.
މެޗް ނިމުމަށްފަހު ޕްލިސް ޖޫނިއަރ ޓީމްގެ ކޯޗް (ފައްލޯ) ވަނީ އާރުބީޖީ ޓީމާއި ބައްދަލުކޮށް ކުޅުންތެރިންނަށް ހިތްވަރު ދެއްވާ ރަގަޅުކޮށްލަންޖެހޭ ބައެއްކަންކަމާއި ބެހޭގޮތުން އެބޭފުޅާގެ ހިޔާލު ހިއްސާކޮށްފައެވެ.
އާރުބީޖީގެ ރައީސް ވިދާޅުވީ މިހާރުވެސް ކުލަބުގެ ފަރާތުން ވޮލީ އަށް އިސްކަންދީގެން އަންހެން ވޮލީ ޓްރެއިނިންގް ކޭމްޕެއް ކުލަބުގެ އަންހެންޓީމަށް ހާއްސަކޮށް ކުރިއަށްގެންދާ ކަމަށާއި ކުރިއަށް އޮތް ހަފްތާގެ ތެރޭގައި ކުލަބުގެ އަންހެން އަދި ފިރިހެން ވޮލީޓީމް އިތުރު މެޗްތަކެށް ކުޅުމަށް ހުޅުމާލެ ދިއުމަށް ހަމަޖެހިފައިވާކަމަށެވެ. އަދި މިމެޗަކީ ހުޅުމާލޭގައި ވޮލީކުޅެމުން އަންނަ ޓީމެއްގެ ދައުވަތަކަށް ކުރާދަތުރެއްކަމަށެވެ.
” މިކުލަބުގެ އަންހެން އަދި ފިރިހެން ވޮލީ ޓީމް އާއި އެކު މެޗް ކުޅެން ބޭނުންވާ ޓީމްތަކަށް އަބަދުވެސް އުފަލާއި އެކު މަރުހަބާ ކިޔާން ” އާރުބީޖީގެ ރައީސް ވިދާޅުވީއެވެ.
މިގެ އިތުރު ކުލަބުގެ ރައީސް ވިދާޅުވީ މިކުލަބުން އަބަދުވެސް ކުޅުންތެރިން އުފެއްދުމުގައި ރާއްޖޭގެ ތަޖްރިބާކާރު ކޯޗުންގެ އެހީތެރިކަން ހޯދާކަމަށާއި ކުލަބުގެ އަންހެން އަދި ފިރިހެން ޓީމަށް މި ފަހުން އެންމެ ރަގަޅު މަސައްކަތެއް ކޮށްދެއްވާފައިވާ ފަރާތަކީ އއ.ބޮޑުފޮޅުދޫގެ ދަރިއެއްކަމަށްވާ ކުރީގެ ރާއްޖޭގެ ގައުމީޓީމްގެ އެސިސްޓެންޓް ކޯޗްގެ މަޤާމުވެސް އަދާކޮށްފައިވާ އަދި ވޮލީގައި ގިނަ ކުޅުންތެރިންތަކެށް ތަމްރީން ކުރުމުގައި މިހާރުވެސް ހަރަކާތްތެރިވަމުން މޯލްޑިވްސް ޕޮލިސް ސާވިސްގައި ވަޒީފާ އަދާކުރަމުން އަންނަ ހާލިދު މުހައްމަދު ( ހާލީ ކޯޗް) ކަމަށެވެ.
އާރުބީޖީ ސްޕޯރޓްސް ކުލަބުގެ ރައީސް ވިދާޅުވީ ހާލީ ކޯޗާ އެކީ ކުލަބުން ވޮލީ ކުރިއެރުވުމުގައި އަދި ކުޅުންތެރިންގެ ހުނަރު ރަގަޅުކުރުމަށްޓަކައި ގިނަ މަސްވަރާތަކެށް މިހާރު ކުރަމުން އަންނަކަމަށާއި ނިމިދިޔަ މި މެޗްގައި ކުޅުންތެރިން ދެއްކި ކުޅުމުގައާއި ގޭމްގައި ހާލީ ކޯޗްގެ ހިއްސާ ބޮޑުކަމަށެވެ.
” މި ކުލަބުގެ ހިންގާކޮމިޓީގެ ނަމުގައި އަދި ވޮލީ ކުޅުންތެރިންގެ ނަމުގައި ހާލީ ކޯޗަށް ވަރަށް ހާއްސަ ޝުކުރެއް އަދާކުރާކަމަށާއި އަދި ކުލަބު ޓީމްގެ ސެޓަރ އާމިރު އިބްރާހިމް އަކީ މުޅި ކުލަބުގެ ކުޅިވަރު ޓީމްތަކަށް ކުޅުންތެރިން ޓްރެއިނިން ކުރުމުގައި އެންމެއިސް ދައުރެއް އަދާކުރާ ބޭފުޅާކަމައްވަތި އެކަމަށްޓަކައި އެބޭފުޅާއަށްވެސް ވަރަށް ހާއްސަޝުކުރެއް އަދާކުރަން ” އާރުބީޖީގެ ރައީސް ވިދާޅުވިއެވެ.
