އިޓަލީގައި ދިވެއްސަކު މަރާލާފައި އޮތްވާ ފެނިއްޖެއެވެ.
މަރައިލައިފައި ވަނީ ހދ.ނޮޅިވަރަމްފަރު، އުމުރުން 44 އަހަރުގެ ވައިމަތީގޭ މަހްމޫދު އިމާދެވެ. އިމާދަކީ، އިޓަލީ މީހަކާ އިނދެގެން، އެ ގައުމުގައި ދިރިއުޅެމުން ދިޔަ މީހެކެވެ. މިވަގުތު އޭނާގެ އަންހެނުންނާއި ބަފައިބެ ހުރީ ނޮޅިވަރަމްފަރުގައެވެ.
އިމާދުގެ ކޮއްކޮ ހަވާލާދީ ” ދިޔަރެސް ” ބުނެފައިވަނީ އިމާދަށް ވަރަށް ބޮޑަށް އަނިޔާކޮށްފައިވާ ކަމަށް ނޫސްތަކުގައި ލިޔެފައި އޮތަސް، އަދި އެކަން ޔަޤީން ނުވާކަމަށެވެ.
“އަންހެނުން ބުނީ ހަށިގަނޑުގައި އިތުރު އަނިޔާއެއް ނެތް ކަމަށް” އިމާދު ގެ ކޮއްކޮ ބުންޏެވެ. އެހެން ނަމަވެސް އިމާދުގެ ފޯނު ފުނޑާލާފައިވާ ކަމަށް އޭނާ މައުލޫމާތުދިނެވެ.
އިމާދު އިޓަލީގައި އުޅޭތާ މިހާރު 8 ވަރަކަށް އަހަރުވެއްޖެ ކަަމަށް އޭނާގެ ކޮއްކޮ ބުންޏެވެ. އަދި ރާއްޖޭގައި ހުރެފައި އިޓަލީއަށް އެންމެ ފަހުން ދިޔައީ މިއަހަރުގެ މޭއި މަހު ކަމަށާއި މި މަހު 20 ގައި ރާއްޖެ އަންނަން އިމާދު ވަނީ ޓިކެޓު ނަގާފައި ކަމަށްވެސް އޭނާ ބުންޏެވެ. އިމާދު ދިރިއުޅެނީ އިޓަލީގެ މިލާންގައެވެ. އަދި އެކޮޅުގައި އެކިއެކި މަސައްކަތް ކޮށް އުޅުނު ކަމަށްވެއެވެ.
އިމާދު މަރައިލި ސަބަބު އެނގިފައިނުވާއިރު، މިހާތަނަށް ރާއްޖޭގެ ރަސްމީ އިދާރާއަކުން މިކަމާ ގުޅޭގޮތުން ވަކި އެއްޗެއް ހާމަކޮށްފައެއް ނުވެއެވެ.
