ސާފް ޗެމްޕިއަންޝިޕް 2021ގައި ވާދަކުރާ ރާއްޖެއިން ބޭރުގެ ޓީމުތައް ރާއްޖެ އަންނަން ފަށައިފި އެވެ.
ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) އިން ބުނީ މި މުބާރާތުގައި ވާދަކުރާ ސްރީ ލަންކާ އާއި ނޭޕާލް ގެ ޓީމު މިއަދު ރާއްޖެ އައިސްފައިވާ ކަމަށެވެ.
މިދެ ޓީމަށް ވެލާނާ އިންޓަރނޭޝަލް އެއަރޕޯޓް މަރުހަބާ ކިޔާފައިވަނީ އެފްއޭއެމްގެ އިސްބޭފުޅުން ނެވެ.
އެފްއޭއެމް އިން ބުނީ މި މުބާރާތުގައި ވާދަކުރާ ހުރިހާ ޓީމެއް މިއަދު ރާއްޖެއަންނާނެ ކަމަށެވެ.
އެގޮތުން އިންޑިއާ އަދި ބަންގްލަދޭޝް ޓީމު ރާއްޖެއަންނާނީ މިއަދު މެންދުރުފަހު ކަމަށް އެ އިދާރާއިން ބުނެ އެވެ.
މިއަހަރުގެ މުބާރާތް ކުރިއަށް ދާނީ އަންނަމަހުގެ އެކަކުން ސޯޅައިގެ ނިޔަލަށެވެ. މި މުބާރާތުގެ ޓައިޓްލް ސްޕޮންސަރއަކަށް އުރީދޫ ހަމަޖައްސާފައިވާ އިރު، ކޯ ސްޕޮންސަރ އަކީ އެސްޓީއޯ އެވެ. މެޑިކަލް ޕާޓްނަރގެ ގޮތުގައި އޭޑީކޭ ހޮސްޕިޓަލް ހަމަޖައްސާފައިވާ އިރު، އިންޝުއަރެންސް ޕާޓްނަރއަކީ އެލައިޑް އިންޝުއަރެންސް އެވެ.
މިއަހަރުގެ މުބާރާތް ކުރިއަށްދާނީ “އުރީދޫ ސާފް ޗެމްޕިއަންޝިޕް 2021″ގެ ނަމުގަ އެވެ.
