އަންނަ އޮކްޓޯބަރު މަހުގެ 01 ވަނަ ދުވަހު ރާއްޖޭގައި ފެށުމަށް ހަމަޖެހިފައިވާ ސާފް ޗެމްޕިއަންޝިޕްގައި ވާދަ ކުރާ އިންޑިއާގެ ގައުމީ ފުޓުބޯޅަ ޓީމު ރާއްޖެ އައިސްފިއެވެ.
މި ސަރަހައްދުގެ ގަދަބާރު ކަމުގައިވާ އިންޑިއާގެ ސީނިއާ ގައުމީ ފުޓުބޯޅަ ޓީމު ރާއްޖެ އައިސްފައި ވަނީ، މިއަދު ހަވީރު އެވެ.
އިންޑިއާގެ ގައުމީ ޓީމު ތިބުމަށް ހަމަޖެހިފައިވަނީ ބަނޑޮސް އައިލޭންޑް ރިޒޯޓުގައެވެ.
އިންޑިއާއިން މިފަހަރުގެ މުބާރާތައް އެކުލަވާލި ސްކޮޑްގައި ގޯލްކީޕަރުންގެ ގޮތުގައި، ގުޕްރީޓް ސިންގް، ވިޝާލް ކައިތް އަދި ދީރާޖް ސިންގް މޮރަންތަމް ހިމެނެއެވެ. ޑިފެންޑަރުންގެ ގޮތުގައި ޕްރިތަމް ކޯޓާލް، ސެރިޓަން ފެނާންޑޭޒް، ޗިންގްލެންސަނާ ސިންގް، ރާހޫލް ބެކޭ، ސުބަޝިޝް ބޯސް އަދި މަންދަރު ރާއޯ ޑެސާއީ ސްކޮޑްގައި ހިމަނާފައި ވާއިރު، މިޑްފީލްޑަރުންގެ ގޮތުގައި އުދަންތާ ސިންގް، ބްރެންޑަން ފެނާންޑޭޒް، ލަލެންޑްމަވިއާ، އަނިރޫދް ތާޕާ، ސަހަލް އަބްދުލް ސަމަދު، ޖެކްސަން ސިންގް، ގްލެން މާޓިންސް، ސުރޭޝް ސިންގް، ލިސްޓަން ކޮލާސޯ އަދި ޔާސިރު މުހައްމަދުގެ ނަން ވަނީ ހިމަނާފައެވެ.
އިންޑިއާއިން މިފަހަރު އެކުލަވާލި ސްކޮޑްގައި ފޯވާޑުންގެ ގޮތުގައި 4 ކުޅުންތެރިއެއް ވަނީ ހިމަނާފައެވެ. އެއީ މަންވީރު ސިންގް، ރަހީމް އަލީ، ސުނިލް ޗެތްރީ އަދި ފާރޫގް ޗައުދަރީއެވެ.
