ދިވެހި ސަޕޯޓަރުން ކުރިމަތީ ދިވެހި ގައުމީ ޓީމު ބަލިކޮށް ސާފް ޗެމްޕިއަންޝިޕްގެ 2 ވަނަ މެޗު ނޭޕާލް އިން ކާމިޔާބު ކޮށްފިއެވެ. ނޭޕާލް އިން ރޭ ކުޅުނު މެޗެ ކާމިޔާބު ކުރީ 1-0 ގެ ނަތީޖާ އަކުންނެވެ.
މިއީ ސާފް ޗެމްޕިއަންޝިޕްގައި މިހާތަނަށް ނޭޕާލާ ދެކޮޅަށް ކުޅުނު އަށް މެޗުގެ ތެރެއިން ރާއްޖެ ބަލިވި ފުރަތަމަ ފަހަރެވެ. ނޭޕާލް އިން އެންމެ ފަހުން ރާއްޖެ މައްޗަށް ކުރި ހޯދާފައި ވަނީ މީގެ 37 އަހަރު ކުރިންނެވެ.
ރޭގެ މެޗު ފަށައިގެން މާ ގިނައިރުތަކެއް ނުވެ ގައުމީ ޓީމުން ވަނީ ހަމަލާތައް އިދިކޮޅުގެ ގޯލަށް އަމާޒު ކުރަން ފަށާފައެވެ. އެގޮތުން މެޗުގެ 17 ވަނަ މިނެޓުގައި ސެންޓޭ ފޮނުވާލި ބާރު ހަމަލާ ފާހަގަ ކޮށްލެވެއެވެ. އެހެންނަމަވެސް އެ ބޯޅަ އަމާޒުވޯ ނޭޕާލްގެ ކީޕަރު ކިރަންގެ އަތަށެވެ.
މީގެ އިތުރުންވެސް ފުރަތަމަ ހާފުގެ 23 ވަނަ މިނެޓުގައި ދަގަނޑޭއަށް ލިބުނު ފުރުސަތު ފާހަގަ ކޮށްލެވެއެވެ. އެހެންނަމަވެސް ފޭދޫ އިއްބެއަށް ދަގަނޑޭ ދޭން އުޅުން ޕާސް ދަގަނޑޭއަށް ޖައްސާލެވުނީ ބޭރަށެވެ.
ދެވަނަ ހާފު ފެށިގެން މެޗުގެ ކޮންޓްރޯލް ނޭޕާލް ޓީމުން ވަނީ ނަގާފައެވެ. ގިނަ ހަމަލާތަކެއް ދިވެހި ޓީމުގެ ކޮޅަށް ނޭޕާލް އިން އަމާޒު ކުރިނަމަވެސް ޑިފެންޑަރުން ވަނީ ހަމަލާތައް ހުއްޓުވާފައެވެ.
61 ވަނަ މިނިޓްގައި ރާއްޖޭން ނުރައްކާތެރި ހަމަލާއެއް ފޮނުވާލި އެވެ. އޭރިއާ ކައިރިން ލިބުނު ހިލޭ ޖެހުމަކުން ސެންޓޭ ނެގި ބޯޅަ ސަމުއްޓޭ ބޮލުން ފޮނުވާލުމުން ކީޕަރު ކިރަން ވަނީ އެ ބޯޅަ މަތަކޮށްފަ އެވެ.
މެޗުގައި ނޭޕާލުން ޖެހި ހަމައެކަނި ގޯލް 86 ވަނަ މިނިޓުގައި ޖެހީ ދެވަނަ ހާފުގައި ބަދަލު ކުޅުންތެރިއެއް ގޮތުގައި ކުޅެން އެރި މަނީޝް ޑަންގީ އެވެ. އޭނާ މި ލަނޑު ޖެހީ ނޭޕާލުން އުފެއްދި ކައުންޓާ އެޓޭކެއްގައި ހާފުގެ މެދެއްހާ ހިސާބުން ބޯޅަ ހިފައިގެންގޮސް ރާއްޖޭގެ ދެ ކުޅުންތެރިން ކައިރިން ނައްޓާލުމަށް ފަހު އޭރިއާތެރެއަށް ވަދެ، ގޯލުގެ ތިރީ ކަނަށް ބޯޅަ ފޮނުވާލައިގެންނެވެ.
