އދ. ދަނގެތީގައި މަރާލުމަށްފަހު ފަޅުގެއެއްގެ ވަޅަކަށް ވައްޓާލާފައި އޮތް މީހަކު ފެނިއްޖެ އެވެ.
ދަނގެތީ ރަށު ކައުންސިލްގެ ރައީސް މުއާވިޔަތު ރަޝީދު ހަވާލާދީ “ހަފްތާ” ގައިވަނީ މަރާލާފައި އޮއްވާ ފެނުނީ އެރަށު ބޮޑު ވިޔަފާރިވެރިއެއް ކަމަށްވާ މަހުމޫދު އަބޫބަކުރު، 55 އ. ކަމަށެވެ. އޭނާ މަރާލާފައި އޮއްވައި ފެނުނީ، ރޭ މެޗު ބެލުމަށްފަހު ގެއިން ނުކުތް ގޮތަށް ހަބަރެއް ނުވެގެން ހޯދަމުން ދަނިކޮށް މިއަދު މެންދުރުފަހު ކަމަށްވެސް އޭނާ ވިދާޅުވި އެވެ.
“އާއިލާއިން ބުނަނީ އޭނާ ރޭ، ރާއްޖޭގެ މެޗު ބެލުމަށްފަހު ގެއިން ނުކުތް ގޮތަށް ހަބަރެއް ނުވާ ކަމަށް. އޭނާގެ ހަބަރެއް ނުވެގެން ރިޕޯޓްކުރީ މިއަދު ހެނދުނު. ދެން އިދާރާތަކާއި ރައްޔިތުން ގުޅިގެން އޭނާ ހޯދުމުގެ މަސައްކަތް ކުރަމުން ދަނިކޮށް ފެނުނީ ފަޅުގެއެއްގައި ހުރި ފެންވަޅެއްގައި އެކޮޅު ކޮޅުން އޮއްވައި،” މަރާލާފައިވާކަން ކަށަވަރު ކޮށްދެއްވަމުން މުއާވިޔަތު ވިދާޅުވި އެވެ.
އޭނާ ވިދާޅުވީ، އެ ސަރަހައްދުގައި ފުލުހުންނާއި ފޮރެންސިކުންވެސް ހަރަކާތްތެރިވަމުންދާތީ، މަރާލާފައި އޮއްވައި ފެނުނު މީހާގެ ހަށިގަނޑުގައި އެއްވެސް އަނިޔާއެއް ހުރިކަން އަދި ނޭނގެ އެވެ. ނަމަވެސް ވަޅަށް އެއްލާލާފައި އޮތީ، ފައި އެއްސުމަށްފަހު ބޮލާއި ފައިގައި ގޯނި އެއްސުމަށްފަހު ކަމަށް ވިދާޅުވި އެވެ.
