އދ. ދަނގެތީގައި މަރާލާފައި އޮއްވައި ފެނުނު މަހުމޫދު އަބޫބަކުރުގެ މަރުގެ މައްސަލައިގައި ހައްޔަރު ކުރި ބިދޭސީ މީހާ މަހިބަދޫއަށް ގެންގޮސްފި އެވެ.
އެ ރަށު ނެދުންގޭގައި އުޅޭ އުމުރުން ދުވަސްވީ މީހަކު ބެލުމަށް ގެނެސްފައި ހުރި ސާލިމް އިއްޔެ ހައްޔަރުކޮށް، އޭނާ ބަންދުގައި ބަހައްޓައިގެން ތަހުގީގު ކުރުމަށް ކޯޓުން މިއަދު 15 ދުވަސް ވަނީ ދީފަ އެވެ.
މައުލޫމާތު ލިބިފައިވާ ގޮތުގައި މިގެ އިރުކޮޅެއް ކުރިން ފުލުހުން ވަނީ، ސާލިމް މަހިބަދޫއަށް ގެންގޮސްފައެވެ. މަހިބަދޫއަށް ގެންދިޔައީ ސީދާ ކޮން ސަބަބަކާ ހުރެ ކަމެއް ފުލުހުން އަދި ހާމައެއް ނުކުރެ އެވެ. އެހެންނަމަވެސް މައުލޫމާތު ލިބިފައިވާ ގޮތުގައި އޭނާ މަހިބަދުއަށް ގެންދިޔައީ ދަނގެތީ ޕޮލިސް ސްޓޭޝަންގައި މީހުން ބަންދުކުރަން އެކަށީގެންވާ ގޮޅިއެއް ނެތުމުންނެވެ.
ދަނގެތިން ވާހަކަ ދެއްކި މީހާ ބުނީ ބިދޭސީ މީހާ ދިރިއުޅޭ ގެއިން ފޮށިގަނޑަކަށް އެއްޗެހިތަކެއް އަޅައިގެން ފުލުހުންގެ ޓީމު އެގެއިން ނުކުމެގެން ދިޔަތަން ފެނުނު ކަމަށާއި ނަމަވެސް އެއީ ސީދާ ކޯއްޗެއް ކަމެއް ނޭނގޭ ކަމަށެވެ. އަދި މިއަދުވެސް ފުލުހުން އެ ބިދޭސީ މީހާއާއެކު އޭނާ ދިރިއުޅޭ ގެއަށް އައިސް ކޮންމެވެސް ކަމެއް ކުރުވި ކަމަށްވެސް ބުންޏެވެ.
އެ ބިދޭސީ މީހާއަކީ ދަނގެތި، ނެދުންގޭގައި ހުންނަ އުމުރުން ދުވަސްވީ މީހަކު ބަލަން އެގޭގައި ހުންނަ މީހެކެވެ. ދަނގެތީ މީހުން ބުނީ އޭނާއަކީ ފަސްއިރު، ފަސް ނަމާދު ކުރާ މީހެކެވެ.
