އދ.ދަނގެތީ މަޙްމޫދު އަބޫބަކުުރު މަރައިލި މައްސަލައިގައި ހައްޔަރުކޮށްފައިވާ މުޙައްމަދު ސާލިމް މަޙްމޫދުގެ ކަށުނަމާދަށް ދިޔަކަން އެނގިއްޖެއެވެ.
މި މަހުގެ 13 ވަނަ ދުވަހުގެ ރެއިން ފެށިގެން މަޙްމޫދަށް ވީނުވީއެއް ނޭނގި ގެއްލިގެން ހޯދަމުން ދަނިކޮށް، އެ ރަށު ފަޅުގެއެއްގެތެރޭގައި ހުރި ވަޅެއްގެތެރޭ މަރާލައިފައި އޮއްވާ ފެނުނީ 14 ވަނަ ދުވަހުގެ މެންދުރުފަހުގެ ވަގުތެއްގައެވެ. މަޙްމޫދުގެ ޖަނާޒާގެ ކަންކަން ކުރިއަށް ގެންދިޔައީ 15 ވަނަ ދުވަހުގެ ޢަޞުރަށްފަހުގައެވެ.
މަޙްމޫދު އަބޫބަކުުރުގެ މަރާއި ގުޅިގެން 16 ވަނަ ދުވަހު ވަނީ ދަނގެތީ ”ނެދުންގެ“ ބަލައި ފާސްކޮށްފައެވެ. އެ ގެއަކީ ދުވަސްވީ މީހަކު އުޅެމުންދާ ގެއެކެވެ. ސާލިމަކީ އާދަންބެ ބަލަހައްޓަން ގެނެސްފައި ހުންނަ ބަންގްލަދޭޝްގެ މީހެކެވެ.
މި މައްސަލައާއި ގުޅިގެން ކޯޓު ޢަމުރެއްގެ ދަށުން ސާލިމް ހައްޔަރުކުރީ އެ ދުވަހުގެ ހަވީރު 16:00 ހާއިރުއެވެ. އޭނާގެ ބަންދާމެދު ގޮތެއް ނިންމަން މި މަހުގެ 17 ވަނަ ދުވަހުގައި ދަނގެތީ ކޯޓަށް ހާޒިރުކުރުމުން ބަންދަށް ވަނީ 15 ދުވަސް ޖަހާފައެވެ.
މިހާރު ނޫހުން ޢާންމުކުރި ފޮޓޯއަކުން ފެންނަ ގޮތުގައި ސާލިމް ވަނީ މަޙްމޫދުގެ ކަށު ނަމާދުގައި ބައިވެރިވުމަށް ދަނގެތީ މިސްކިތަށް ގޮސްފައެވެ. އެއީ ކަށު ނަމާދުގެ ކުރިން ނަގާފައިވާ ފޮޓޯއެކެވެ.
އިއްޔެގެ ވަގުތެއްގައި ސާލިމް ވަނީ މަހިބަދޫ ޕޮލިސް ސްޓޭޝަނަށް ބަދަލުކޮށްފައެވެ. އެ ރަށަށް ގެންދިއުމުގެ ކުރިން ފުލުހުން ވަނީ ސާލިމް ދިރިއުޅޭ ގެއަށް އޭނާ ގެންގޮސް، އޭނާ ޢަމަލުކުރި ގޮތް ވެސް ކުޅުވައިފައެވެ. އޭގެ އިތުރުން މަޙްމޫދު މަރާލައިފައި ވައްޓާލައިފައި އޮތް ވަޅު ކައިރިއަށް ވެސް ގެންދިޔައެވެ.
މަޙްމޫދުގެ މަރާއި ގުޅިގެން ސާލިމަށް ޝައްކު ކުރެވޭ ބައެއް ކަންކަން ހުރި ނަމަވެސް، އެކަމާ ގުޅޭ ގޮތުން ފުލުހުން އަދި އެއްޗެއް ހާމައެއް ނުކުރެއެވެ.
