ރައީސް އިބްރާހިމް މުހައްމަދު ސޯލިހް، ބޮޑުފޮޅުދޫގައި އަލަށް އިމާރާތްކުރި މަސްކިތް ހުޅުވައިދެއްވައިފިއެވެ.
އއ. އަތޮޅަށް ކުރައްވަމުންގެންދަވާ ދަތުރުފުޅުގެ ތެރެއިން އެ އަތޮޅު ބޮޑުފޮޅުދޫއަށް ވަޑައިގެން ރައީސް ވަނީ މިސަރުކާރުން މަސައްކަތްފެށި އެރަށުގެ އާ މިސްކިތް ހުޅުވާދެއްވާފައެވެ.
ބޮޑުފޮޅުދޫގައި އަލަށް އިމާރާތްކޮށްފައިވާ މިސްކިތަކީ 300 މީހުންގެ ޖާގައިގެ މިސްކިތެކެވެ. މި މިސްކިތުގެ މަސައްކަތް ފަށާފައިވަނީ 2019 ވަނަ އަހަރުގެ ޖުލައި މަހުގެ ތެރޭގައެވެ.
ބޮޑުފޮޅުދުއަށް ޕީއެސްއައިޕީގެ މަޝްރޫތަކުގެ ގޮތުގައި ފާއިތުވި ދެ އަހަރުގެ ތެރޭގައި 11.8 މިލިއަން ރުފިޔާގެ މަޝްރޫއުތައް ހާއްސަ ކުރެވިފައިވާކަމަށްވެސް ރައީސް އޮފީހުން މައުލޫމާތުދެއެވެ.
އއ. އަތޮޅަށް ކުރައްވަމުން ގެންދަވާ ދަތުރުފުޅުގެތެރެއިން ރައީސް ސޯލިހް މިއަދުވަނީ އއ. މަތިވެރިއަށް ވަޑައިގެން އެ ރަށު ރައްޔިތުންނާ ބައްދަލުކުރައްވާ އެ ފަރާތްތަކުގެ ހުރި ކަންބޮޑުވުންތައް ސާފުކުރައްވާފައެވެ. އަދި އެކަންކަން ހައްލުކުރުމަށް ސަރުކާރުން ކުރަމުން އަންނަ މަސައްކަތްތައް ފާހަގަކުރެއްވިއެވެ. މީގެއިތުރުން އެ ރަށުގެ ކައުންސިލާއި އަންހެނުންގެ ތަރައްޤިއަށް މަސައްކަތްކުރާ ކޮމިޓީއާވެސް ބައްދަލުކުރައްވާފައިވެއެވެ.
