ދިވެހިންގެ އެވަރެޖެ އުމުރަކީ 60 އަހަރާއި 70 އަހަރާ ދެމެދުގައެވެ. އެހެންނަމަވެސް ދިވެހިންގެ ތެރޭގައިވެސް ގަރުނަކަށްވުރެ ގިނަދުވަހު ދިރުއުޅެފައިވާ ދިވެހިން ވެސް އެބަތިއްބެވެ.
ރާއްޖޭގައި މިއަދާ ޖެހެންދެން އުމުރުން އެންމެ ދުވަސްވީ އެކަކުގެ ގޮތުގައި ހުރީ ހދ ހަނިމާދޫ އަންނާރުމާގެ އަބްދުއްރަހުމާން މޫސާ (ހަތިފުށީ ރަހުމާންބެ) އެވެ. އޭނާ އުފަންވީ ހއ ހަތިފުއްޓަށެވެ. އުފަންވީ 11 ނޮވެބަރު 1913 ގައެވެ. ނިޔާވުމާ ހަމަޔަށް ރަހުމާންބޭ ދިރިއުޅުނީ ޢާއިލާއެކު ހދ ހަނިމާދޫގައެވެ.
އަބްދުއްރަހުމާން މޫސާގެ ހަގު ފިރިހެން ދަރިފުޅު އަބްދުއްރަސީދުއާއި ހަވާލާދީ “ޕީއެސްއެމް” އިން ރިޕޯޓު ކޮށްފައިވާ ގޮތުން ހަތިފުށީ ރަހުމާންބެގެ އެންމެ ފަހު ވަގުތުކޮޅު ހެދަކުރެވުނީ އެމްބިއުލަންސްގެ ތެރޭގައެވެ. އޭރު ގާތްގަނޑަކަށް 07:15 އެވެ. ހޮސްޕިޓަލަށް ގެންދިޔުމުން ޑޮކްޓަރު ބަލާފައި ބުނީ ގުދުރަތީ މަރެއްކަމަށެވެ.
ޢަބްދުއްރަޝީދު “ޕީއެސްއެމް” ކިޔައިދިން ގޮތުގައި އޭނާގެ ބައްޕައަކީ ފެށުނީއްސުރެ ޢާމްދަނީ ހޯދުމަށް މަސްވެރިކަމުގަ ހަރަކާތްތެރިވި މުރާލި މީހެކެވެ. އެގޮތުން ބައްޕަގެ ފައި ބިނދުމާ ހިސާބަށްވެސް މަސްވެރިކަމުގައި އައީ ޙަރަކާތްތެރިވަމުންކަމުގައި ޢަބްދުއްރަޝީދު ކިޔައިދިނެވެ. އެންމެ ފުރަތަމަ ޢާއިލާގެ ދޯންޏެއްގައި ވަރަށް ގިނަ ޒަމާންތަކެއްވަންދެން މަސްވެރިކަން ކުރުމަށްފަހު ޢާއިލާއިން އެދޯނި ވިއްކާލުމާހަމައަށް އުޅުނީ އޭގައެވެ. ފަހުން ކުޑަ ދޯންޏެއްގައިވެސް އަމިއްލައަށް މަސްވެރިކަން ކުރުމުގައި ޢަބްދުރަޙުމާނުވަނީ އުޅެފައެވެ. ބައްޕަ އެހާ ކުރާހިތުން ކުރާ ކަމަކަށްވުމުން ބައްޕަގެ ޢުމުރުން ދުވަސްވުމުންވެސް ޢައިލާއިން އެކަން ހުއްޓުވުމުގެ ބަދަލުގައި އެކަމަށް އެއްބާރުލުންދީ ބައްޕައަށް އެހީތެރިވެފައިވާކަން އޭނާ ފާހަގަކުރިއެވެ.
މަސްވެރިކަމުގެ އިތުރުން ޢަބްދުރަޙުމާނުވަނީ ޒުވާންދުވަސްވަރު ރުއްވެސް އަރާފައެވެ. އަދި އޭނާއަކީ ކުޅިވަރަށް ލޯބިކުރާ މީހެއްކަމަށާއި އެންމެ ފޯރީގަ ކުޅެއުޅުނީ ފުޓުބޯޅައާއި ކުރިކެޓުކަމަށް ޢާއިލާއިން ބުނެއެވެ. މީގެއިތުރުން އޭނާއަކީ ދިވެހި އަދަބިއްޔާތުގެ އެކި ކަންކަމަށްވެސް ވަރަށްލޯބިކުރާ މީހެއްކަމަށް ޢާއިލާއިން ބުނެއެވެ.
ޢަބްދުއްރަޙުމާނު ވަޅުލާފައިވަނީ މިއަދުގެ މެންދުރު ނަމާދަށްފަހު ހަނިމާދޫ ސަހަރާގައެވެ. ޢަބްދުރަޙުމާނު ކޮށްފައިވަނީ އެންމެ ކައިވެންޏެކެވެ. އެކައިވެންޏަށް 6 ދަރިންވަނީ ލިބިފައެވެ. އެއީ 2 ފިރިހެން ދަރިންނާއި 4 އަންހެން ދަރިންނެވެ. އަދި ނިޔާވިއިރު، ކާފަކިޔާ 40 ކުދިންނާއި އަދި މުނިކާފަކިޔާ 38 ދަރިން ދުނިޔެގައި އެބަތިއްބެވެ.
މި ޚަބަރު ފުރިހަމަ އެއްނޫން މިހާ ގިނަދުވަސް ވީ މީހެއްގެ މުނިކާފަގެ ވެސް ކުދިން ތިބޭނެކަމަށް ބެލެވޭ އެ މިަޢޮލޫ މާތުވެސް ކިޔުން ތެރިން ބޭނުންވާނެކަން ފެންނަނީ