އެއީ، ހަނދާން ހުންނަން ފެށީއްސުރެ އަހަރެމެންގެ އާއިލީ އެކުވެރިއެކެވެ. ބައްޕަ މަހަށްދާ ދޯނީގެ ވެރިޔާ އެވެ. އެތަކެއް ހުނަރެއްގެ ވެރިއެކެވެ. ފަންނު ވެރިއެކެވެ. އުޅުން ހުރި ސާދާ ދިވެހި ދަރިއެކެވެ. ކަނޑު ފަޅުގެ ހަޤީޤީ ދަރިއެކެވެ. ދަތުރު ފަތުރު ކުރަން އެވަރެއް ނެތް މާލިމީ އެކެވެ. ކޮންމެ ވައްތަރެއްގެ މަސްވެރިކަމަށް ވިޔަސް “ޖަހާނުލެވޭނެ” ކެޔޮޅެކެވެ. އެތަކެއް ކަނޑުތަކާއި ފަޅުތައް ހިތުދަސް ނެވިގޭޓަރެކެވެ. ބައެއް ކަވި މަސައްކަތްތަކަށް ހަމަ އެވަރެއް ނެތެވެ. އޮޑި ވެރިއެކެވެ. ނިކަން ގޮތެއްގައި ހިފެހެއްޓި ހަށިހެޔޮ ދުޅަހެޔޮ އެއްކަށި ވީރެކެވެ. ކުރަން ދިމާކުރި ކޮންމެ ކަމެއް ހަށީގެ މަދުން ހިތްވަރު ނެރެގެން ޙާޞިލްކުރި ހިތްވަރުގަދަ ދަރިއެކެވެ. އަމިއްލަ މަސައްކަތުން އެތަކެއް ކުރިއެރުމާއި އަރުތަ ހޯދި ފަޚުރުވެރިއެކެވެ. ނިކަން ޗާލު އިހުގެ ވާހަކަތައް ކިޔައިދޭ ހުށައެޅުންތެރިއެކެވެ. އިހުގެ ރައިވަރާއި އަންބާ އަދި ކާ ގެ “އަދަބީ ޖާޑިއެކެވެ”. އެތަކެއް ތަޖުރިބާތަކުން ފުރިފައިވާ އަޑި ނޭނގޭ ފުން ކަނޑެކެވެ. ވަރަށް ހިތްހެޔޮ، ލައްކަ ރަހުމަތްތެރިން ގިނަ ލަފާދާރެކެވެ. ނަމާދަށް ފަރުވާތެރިވި އަޅުވެރިއެކެވެ. އަނބި މީހައަަށް އިންތިހާއަށް ހެޔޮ ފިރިއެކެވެ. ދަރިންދެކެ ވަރަށް ލޯބިވި ބައްޕައެކެވެ. ކާފަ ދަރިންނަށް ރަނެއް މަލެއް ފަދަ ކާފައެކެވެ. އަދި އެއީ ހަތިފުށީގެ “ރަން ޖީލުގެ” މައި އެއްތަނބެވެ. މިއަދާއި ހަމައަށް، ދުނިޔޭގައި ތިބި އެންމެ ގިނަދުވަސްވީ ދިވެހިންގެ ތެރެއިން އެކެކެވެ. މަރުޙޫމްގެ ފުރާނައަށް ސުވަރުގޭގެ ދާއިމީ ނިޢުމަތް މިންވަރު ކުރައްވާށި. އާމީން.
