ހދ.ކުޅުދުއްފުށި ސިޓީގައި ޝަހީދު ހުސައިން އާދަމްގެ ހަނދާނީ ބިނާއެއް ގާއިމުކުރުމުގެ ވިސްނުން ގެންގުޅުއްވާ ކަމަށް އެ ސިޓީގެ މޭޔަރު މުހައްމަދު އާތިފް ވިދާޅުވެއްޖެ އެވެ.
ނަސްރުގެ ދުވަސް ފާހަގަކުރުމަށް މިއަދު ކުޅުދުއްފުށީގައި ބޭއްވި ހާއްސަ ޖަލްސާގައި ވާހަކަދައްކަމުން އާތިފް ވިދާޅުވީ ރަށަށް ނިސްބަތްވާ ފަހުރުވެރި އަބްތޯލުންގެ ޒިކުރާ އަބަދުވެސް އާލާވާނެ ފަދަ ބިނާތައް ފެންނަން ހުރުމަކީ މުހިއްމު ކަމެއް ކަމަށާއި އެގޮތުން އެ ރަށުގައި ޝަހީދު ހުސެއިން އާދަމްގެ ބިނާއެއް ގާއިމުކުރުމުގެ ވިސްނުން ކައުންސިލުން ގެންގުޅޭ ކަމަށެވެ.
“ސިޓީ ކައުންސިލްގެ ވިސްނުން އެބަހުރި ހުސެއިން އާދަމްގެ ހަނދާނީ ބިނާއެއް ބިނާކުރުމަށް. އެ މަސައްކަތް އަޅުގަނޑުމެން ކުރާނަން” އާތިފް ވިދާޅުވި އެވެ.
މި ޖަލްސާގައި ވާހަކަދައްކަމުން އާތިފް ވަނީ ޝަހީދު ހުސެއިން އާދަމްގެ މަތިވެރި ޖިހާދާއި މެދު ކުޅުދުއްފުށީ ރައްޔިތުންނަށް ވުރެ ބޮޑަށް ފަހުރުވެރިވާނެ އިތުރު ބަޔަކު ނުތިބޭނެ ކަމަށްވެސް ވިދާޅުވެފަ އެވެ.
ނަސްރުގެ ދުވަސް ފާހަގަކުރަނީ 3 ނޮވެމްބަރު 1988 ގައި ލަންކާގެ ކުލީ ސިފައިންގެ ބަޔަކު ގޮވައިގެން ދިވެހީންގެ ޚާއިނުންގެ ބަޔަކު މާލެއަށް ހަމަލާދީ، ދިވެހިރާއްޖޭގެ ރައްޔިތުންގެ ދިފާޢުގައި ޝަހީދުވެވަޑައިގަތް 19 ދިވެހިންގެ ޤުރުބާނީގެ އަގުވަޒަން ކުރުމުގެ ގޮތުންނެވެ.
