ހަނިމާދޫ ކައުންސިލުން ދަނޑުވެރިން މަގުމަތި ކުރުމަށްފަހު ދަނޑުވެރިންނަށް ކޯސް ހިންގަން އިއުލާން ކޮށްފިއެވެ.
ހަނިމާދޫ ކައުންސިލުން މިއަދު ސަރުކާރުގެ ގެޒެޓްގައި ކުރި އިއުލާނެއްގައި ބުނެފައިވަނީ ހދ. ހަނިމާދޫގެ ދަނޑުވެރިންނަށާއި، ދަނޑުވެރިކަން ކުރުމަށް ޝަޢުޤުވެރިވާ ފަރާތްތަކަށް އަމާޒުކޮށްގެން 2021 ނޮވެމްބަރ 15 އިން 24 އަށް ހަނިމާދޫ އެގްރިކަލްޗަރ ސެންޓަރ މެދުވެރިކޮށް އެ ކައުންސިލުން ދަނޑުވެރިކަމުގެ ކޯހެއް ހިންގުމަށް ވަނީ ހަމަޖެހިފައިވާކަމަށެވެ.
މިކޯހުގައި ބައިވެރިވުމަށް ޝަޢުޤުވެރިވާ ފަރާތްތަކުން 2021 ނޮވެމްބަރ 07 ވާ އާދީއްތަ ދުވަހުގެ 13:00 ގެ ކުރިން ފުރިހަމަ ނަމާއި އެޑްރެސް، އައިޑީކާޑު ނަންބަރު، ޢުމުރު އަދި ފޯނު ނަންބަރު އެނގޭނެގޮތަށް ހަނިމާދޫ ކައުންސިލުގައި ނަންނޯޓު ކުރެއްވުން އެދެއެވެ.
ހަނިމާދޫގައި 27 ފަރާތެއް ދަނޑުވެރިން ގޮތުގައި ރަޖިސްޓްރީ ކޮށްފައިވެއެވެ. އެފަރާތްތައް ދަނޑުވެރިކަން ކުރާ ސަރަހައްދުން ނެރެލާފައި ވަނީ 21 އޮކްޓޯބަރ 2021 ގައެވެ. ސަބަބެއް ކަމަށް ބުނެފައިވަނި އެ ސަރަހައްދުގައި ދިވެހި އަސްކަރިއްޔާ އިމާރާތެއް އަޅަން ބިން ދޭންވެގެނެވެ. އެދުވަހުން ފެށިގެން އަދާ ހަމަޔަށް ވެސް ދަނޑުވެރިނަން ބިން ދޫކޮށްފައެއް ނުވެއެވެ.
