ބ.ދަރަވަންދޫ މެޖިސްޓްރޭޓް ކޯޓުގެ އިސް މެޖިސްޓްރޭޓް އަޙްމަދު ލަޠީފު ސަސްޕެންޑުކޮށްފިއެވެ.
ޖުޑީޝަލް ސަރވިސް ކޮމިޝަނުން މިއަދު ބުނީ، ބ.ތުޅާދޫ މެޖިސްޓްރޭޓް ކޯޓަށް ހުށަހެޅުނު ޖިނާޢީ 05 މައްސަލައެއްގައި ހިމެނޭ ޚަސްމަކާ އޮންނަ ގުޅުމަކާއި ގުޅިގެން ކަމަށް ބުނެ، އެ މައްސަލަތައް ބެލުމުން އިސް މެޖިސްޓްރޭޓް އަޙުމަދު ލަޠީފު ތަނާޒުލްވެވަޑައިގެންފައިވާ ކަމަށެވެ. އަދި ހަމަ އެ ޚަސްމާއި ގުޅޭގޮތުން ބ.ދަރަވަންދޫ މެޖިސްޓްރޭޓް ކޯޓަށް ހުށަހެޅުނު މައްސަލައެއް ބެލުމުން ލަޠީފު ތަނާޒުލުވެވަޑައިގެންނެވުމެއްނެތި، އެ މައްސަލައިގައި ހިމެނޭ ޚަސްމުގެ ބަންދާމެދު ގޮތެއް ނިންމަވާފައިވާ ކަމަށެވެ.
ހަމައެހެންމެ އޭނާގެ ބަންދާމެދު ގޮތެއް ނިންމަވާފައިވަނީ ވެސް ކަނޑައެޅިގެން ޤާނޫނާއި ޚިލާފަށްކަމަށް ޖޭއެސްސީން ބުންޏެވެ. ލަޠީފުގެ މި ޢަމަލުތަކަކީ ދިވެހިރާއްޖޭގެ ފަނޑިޔާރުންގެ ޤާނޫނާއި ޚިލާފަށް ކުރައްވައިފައިވާ ޢަމަލެއްކަމަށް ވެސް ޖޭއެސްސީން ބުންޏެވެ.
މި ގޮތުން ޖޭއެސްސީން ނިންމީ މިއަދުން ފެށިގެން މުސާރަ ލިބިވަޑައިނުގަންނަވާ ގޮތަށް 2 ހަފުތާގެ މުއްދަތަށް ފަނޑިޔާރުކަމުގެ މަސައްކަތުން ލަޠީފް ދުރުކުރުމަށެވެ.
ލަޠީފު ސަސްޕެންޑް ކުރަން ނިންމުމާއި ގުޅިގެން ބ.ޖުޑީޝަލް ދާއިރާ ހިންގުން ބ.ކަމަދޫ މެޖިސްޓްރޭޓް ކޯޓުގެ އިސް މެޖިސްޓްރޭޓް އަލްއުސްތާޛު އަޙްމަދު ޝުޖާޢުއާއި ހަވާލުކޮށްފައިވާކަމަށް ޖޭއެސްސީން ބުންޏެވެ.
