ޔުނިޓީ ސްޕޯޓްސް އެކަޑަމީގެ ފަރާތުން ދީނީ އަދި ތައުލީމީ ޝިއާރު ބޯޑު ފުނަދޫ ސްކޫލަށް ހަދިޔާކޮށްފިއެވެ.
މި ހަރަކާތާ ބެހޭގޮތުން ގޮށްކޮޅަށް މައުލޫމާތު ހިއްސާކުރަމުން ޔުނިޓީ ސްޕޯޓްސް އެކަޑަމީގެ ނައިބު ރައީސް ހުސެއިން އަރީފް (ޔޭކޭ) މިއަދު ކުރިޔަށްދިޔަ ހަރަކާތަކީ އެ އެކަޑަމީގެ އަހަރީ ދުވަސް ފާހަގަކުރުމަށް ރޭވިފައިވާ ހަރަކާތްތަކުގެ ތެރޭގައި ހިމެނޭ ޝިއާރު ބޯޑު ހަރުކުރުމުގެ ހަރަކާތުގެ ތެރެއިން ފުނަދޫ ސްކޫލަށް ދީނީ އަދި ތައުލީމާއި ގުޅޭ ޝިއާރު ބޯޑުތަކެއް ހަދިޔާކުރުން ކަމަށެވެ. މިއަދު ހަވާލު ކުރެވުނު 12 ބޯޑު ވަނީ ސްކޫލްގެ އެކި ތަންތަނުގައި ހަރުކޮށްފައެވެ.
މި ހަރަކާތައް ފުނަދޫ ސްކޫލުން ދެއްވި އެއްބާރުލުމަށް ސްކޫލްގެ މެނޭޖްމަންޓަށް ޝުކުރު އަދާކުރާކަމަށާއި، ވަކިން ހާއްސަކޮށް ޕްރިންސިޕަލް ހަފްސާ މެޑަމް ވަރަށް ގާތުން މިހަރަކާތް ބައްލަވާ އިރުޝާދު ދެއްވާފައިވާކަމަށް ޔޫކޭ ވިދާޅުވިއެވެ.
މިހަރަކާތުގައި އެކަޑަމީގެ އުމުރުފުރާ 3 ގެ ފިރިހެންކުދިން ބައިވެރިކޮށްފައިވާއިރު އެކުދިން ބައިވެރި ކުރުވުމުގެ މަގުސަދެއް ކަމުގައި ޔޫކޭ ވިދާޅުވީ އެކުދިންގެ މެދުގައި ޢިޖުތިމާއީ ރޫހު އާލާކުރުންކަމުގައެވެ.
ކުރިއަށް އޮތްތަނުގައި މިފަދަ އިތުރު ބޯޑުތަކެއް ހަރުކުރުމަށް މަސައްކަތްކުރާކަމަށާއި މިހާރުވެސް ސިއްހީ ކަންކަމާގުޅޭ ބޯޑު ތަކެއް ހެދުމަށް ފުނަދޫ ހޮސްޕިޓަލާ މަޝްވަރާކުރެވެމުން ދާކަަންވެސް ޔޫކޭ ވިދާޅުވިއެވެ.
” މިހަރަކާތް ހިންގުމަށް މިކުލަބަށް އެހީތެރިވި އެކަޑަމީގެ ހިންގާ ކޮމެޓީ، ކޯޗުން، އެކަޑަމީގެ ކުދިން އަދި އެކި ގޮތްގޮތުން އެހީތެރިވެދެއްވި އެންމެހާ ފަރާތްތަކަށް ޝުކުރު އަދާކުރަން، އަދި ހާއްސަކޮށް މި އެކަޑަމީގެ މެއިން ސްޕޮންސާރ ތުރީ އޭ.އެން ނައީމްބެގެ އެހީ ފާހަގަކޮށްލަން.” ހުސެއިން އަރީފް (ޔޭކޭ)
ޔުނިޓީ ސްޕޯޓްސް އެކަޑަމީ ވުޖޫދަށް އައިސްފައި ވަނީ 24 ނޮވެމްބަރު 2020 ވަނަ ދުވަހުއެވެ. މިއީ ށ. ފުނަދޫގައި ހިންގާ ފުރަތަމަ އެކަޑަމީ އެވެ.
ފޮޓޯ : ޔުނިޓީ ސްޕޯޓްސް އެކަޑަމީ
