ބޮޑުފޮޅުދޫ އަންހެނުންގެ ތަރައްގީއަށް މަސައްކަތްކުރާ ކޮމެޓީ ގެ ފަރާތުން ބޮޑުފޮޅުދޫ ގައި ކައްކަން ދަސްކޮށްދޭ ކޯހެއް ފަށައިފިއެވެ. 15 ބައިވެރިނާއެކު ރޭފެށި ކޯހުގެ މުއްދަތަކީ 10 ދުވަހެވެ. މި ކޯހުގައި ކިޔަވައިދެއްވަނީ ޖުވޭރިޔާ ވަޖުދީ (ޖުވޭ) އެވެ.
މި ކޯހާ ބެހޭގޮތުން ގޮށްކޮޅަށް މައުލޫމާތު ހިއްސާކުރަވަމުން ބޮޑުފޮޅުދޫ ކައުންސިލްގެ ރައީސް ޝުޖާއު އާދަމް ވިދާޅުވީ އެ ރަށުގެ އަންހެން ކޮމެޓީއަކީ ގިނަ ހަރަކާތްތަކެއް ހިންގަމުން އަންނަ ކޮމެޓީއެއް ކަމަށާއި ނަމަވެސް މިއީ 100 އިންސައްތަ އެކޮމެޓީގެ ހަރަކާތެއްކަމަށެވެ.
“އަންހެނުންގެ ތަރައްގީއަށް މަސައްކަތްކުރާ ކޮމެޓީ ކޯހުގައި ބައިވެރިވާން ފުރުސަތު ހުޅުވާލީ، ކޯހުގައި ބައިވެރި ވުމަށް 1000 ރުފިޔާގެ ފީއެއް ނެގި ނަމަވެސް އެކޮމެޓީން ވަނީ މި ރަށު ސްކޫލް ދަރިވަރުގެ ތެރެއިން 5 ދަރިވަރަކަށް ހިލޭ ކޯހުގައި ބައިވެރިވާން ފުރުސަތު ދެއްވާފައި” ޝުޖާއު އާދަމް ވިދާޅުވީއެވެ.
ޖުވޭރިޔާ ވަޖުދީ (ޖުވޭ) ގިނަ ރަށްތަކެއްގައި ކާމިޔާބު ކަމާއެކު ކައްކަން ދަސްކޮށްދޭ ކޯސް ހިންގާފައިވާ ފަރާތެކެވެ.
ފޮޓޯ : ބޮޑުފޮޅުދޫ ކައުންސިލް
