ރޯގާގެ އަލާމާތްތައް ހުރެގެން ޑޮކްޓަރަށް ދައްކާ ހުރިހާ ބަލިމީހުން ވެސް ކޯވިޑް 19 އަށް ޓެސްޓް ކުރާކަމަށް ހަނިމާދޫ ސިއްހީ މަރުކަޒުން ބުނެފިއެވެ. އެ މަރުކަޒުން އެފަދައިން ވިދާޅުވީ 22 ނޮވެމްބަރ 2021 ދުވަހު ކޮށްފައިވާ އާންމު އިޢުލާނެއްގައެވެ.
އެ އިއުލާނުގައި ބުނެފައިވަނީ ރޯގާގެ އަލާމާތްތައް ހުރެގެން ޑޮކްޓަރަށް ދައްކާ ހުރިހާ ބަލިމީހުން ވެސް އެ މަރުކަޒުން ކޯވިޑަށް ޓެސްޓް ކުރަމުން އަންނަކަމަށާއި، ކޯވިޑަށް ޓެސްޓް ކުރަމުން ގެންދާތީ ރޯގާޖެހި ނުވަތަ ހުންއައި ނަމަވެސް ބައެއް ފަރާތްތަކުން ޑޮކްޓަރަށް ނުދައްކާކަން އެ މަރުކަޒަށް ފާހަގަކުރެވިފައިވާ ކަމަށެވެ.
މިގެ އިތުރުން މީހުން ދިރިއުޅޭ ރަށްރަށުގައި މާސްކު އެޅުމަށް އެޗް.ޕީ.އޭ އިން އިލްތިމާސްކޮށްފައި އޮތް ނަމަވެސް، ރަށުތެރޭގައި މާސްކް ނާޅާ އުޅޭމީހުންގެ އަދަދު މިހާރު ވަރަށް ބޮޑަށް އިތުރުވެފައިވާކަން ފާހަގަ ކުރެވޭ ކަމަށެވެ. ބަލިމަޑުކަމުން ރައްކާތެރިވުމަށް ފަރުވާތެރިކަމާއިއެކު މާސްކު އެޅުމަށާއި އެއްވެ އުޅުން މަދުކުރުމަށް ވެސް އެ މަރުކަޒުން ވަނީ އިލްތިމާސް ކޮށްފައެވެ.
ރޯގާގެ އެއްވެސް އަލާމާތެއް ހުރިނަމަ ލަސްނުކޮށް ޑޮކްޓަރަށް ދެއްކުމަށާއި އަދި ކޯވިޑް ޓެސްޓް ކުރުމަށް ފަހު ނަތީޖާ ނެގެޓިވް ވީ ނަމަވެސް ޤަވައިދުން ޑޮކްޓަރު ދޭ ބޭސް ބޭނުން ކުރުމަށާއި، މީހުން އެއްވެ އުޅޭ ތަންތަނަށް ނުގޮސް ގޭގައި މަޑުކުރުމަށާއި، އަދި ރޯގާ މުޅިން ރަނގަޅު ނުވަނީސް ސްކޫލަށް ވެސް ނުދިއުމަށް އެ މަރުކަޒުން ވަނީ އިލްތިމާސް ކޮށްފައެވެ.
އެންމެންގެ ރައްކާތެރިކަމަށް ޓަކައި ބަލިމަޑުކަމުގެ ހާލަތުގައި ކަނޑައެޅިފައިވާ އުސޫލުތަކާއި އެއްގޮތަށް އަމަލުކޮށް، އެކަންކަމަށް ފަރުވާތެރިވުމަށް ވެސް އެ މަރުކަޒުން ވަނީ އިލްތިމާސް ކޮށްފައެވެ.
