ކޮވިޑް-19 އިން ދިފާޢުވުމަށް ޖަހާ ވެކްސިންގެ ދެވަނަ ޑޯޒް ޖެހިތާ 6 މަސްދުވަސް ވެފައިވާ ފަރާތްތަކުގެ ތެރެއިން ބޫސްޓަރ ޑޯޒް (ތިންވަނަ ޑޯޒް) ގެ ގޮތުގައި ފައިޒަރ ވެކްސިން ޖަހަން ބޭނުންވާ ފަރާތަކަށް ހަނިމާދޫ ޞިއްޙީ މަރުކަޒުން 28 ނޮވެމްބަރ ހެނދުނު 9:00 ކުރިން ނަން ނޯޓްކުރަން ހުޅުވާލައިފިއެވެ.
ހަނިމާދޫ ޞިއްޙީ މަރުކަޒު ވައިބާ ގުރޫޕުގައި ބުނެފައިވަނީ ކޮވިޑް 19 އިން ރައްކާތެރިވުމަށްދޭ ވެކްސިންގެ ބޫސްޓަރ ޑޯޒް ޖައްސަވަން ބޭނުންފުޅުވާ އުމުރުން 80 އަހަރުން މަތީގެ ބޭފުޅުން 28 ނޮވެމްބަރ 2021 ވާ އާދީއްތަ ދުވަހުގެ ހެނދުނު 9:00 ގެ ކުރިން އެމަރުކަޒުގެ ނަންބަރ 6520083 އަށް ގުޅުއްވާ ނަންނޯޓް ކުރެއްވުން އެދޭކަމަށެވެ.
ހަމަ އެކަނި 80 އަހަރުން މަތީގެ ބޭފުޅުން ފާހަގަކޮށްފައި ވާތީ އެޗްޕީއޭއިން ކަނޑައަޅާފައި ލިސްޓުގައި ތިބި ފަރާތްތައް ވެކްސިން ޖަހަން ނަންނޯކުރެވޭނެތޯ ގޮށްކޮޅުން ސުވާލު ކުރުމުން އެމަރުކަޒުގެ އޮފިސަރަކު ވިދާޅުވީ އަބަދުވެސް އެފަރާތްތަކަށް ފުރުސަތު އޮންނާނެ ކަމަށެވެ.
ބޫސްޓަރ ޑޯޒް ޖެހުމަށް އެޗްޕީއޭއިން ހާމަކޮށްފައިވާ ލިސްޓު
- ހަށިގަނޑުގެ ގުނަވަނެއް ބަދަލުކޮށްފައިވާ މީހުން
- ހަށިގަނޑުގެ ދިފާއީ ބާރު ދެރަކުރާ ފަދަ ބޭސްތައް ބޭނުންކުރާ މީހުން
- ދިގު މުއްދަތަކަށް ސްޓެރޮއިޑްގެ ބާވަތްތައް ބޭނުންކުރާ މީހުން (ދުވާލަކު 10 މިލިގްރާމް ނުވަތަ އެއަށްވުރެ މަތީ ޑޯޒެއް 1 މަހުގެ މުއްދަތަށްވުރެ އިތުރަށް ބޭނުންކުރުން)
- ގަވާއިދުން ޑަޔަލިސިސް ހަދާ މީހުން
- ކެންސަރަށް ފަރުވާ ކުރާ މީހުންނާއި ފަރުވާ އަށް ފަހު އެއް އަހަރު ނުވާ މީހުން
- އިސްކޮޅާ އަޅާ ބަލާއިރު ބަރުދަން މަތި މީހުން
- އޮކްސިޖަން ތެރެޕީ ނަގާ މީހުން
- ފުއްޕާމޭގެ އެކި ބަލިތަކަށް ފަރުވާ ކުރާ މީހުން
- ފުރަމޭގެ ބައްޔެއްގައި ފަރުވާދީފައިވާ މީހުން
- ހަކުރުބަލީގެ ސަބަބުން ގުނަވަނަކަށް ގެއްލުންވެފައިވާ މީހުން
- ބަލީގެ ސަބަބުން އެނދުމަތިކޮށްފައިވާ މީހުން
