ޖުމުލަ ހަތް ޓީމާއެކު އާދަމް ސަލީމް ކަޕް ފުޓްބޯޅަ މުބާރާތް 2021 ފަށައިފިއެވެ.
ހޮނިހިރު ދުވަހު ހަވީރު ހަނިމާދޫ ފުޓްބޯޅަ ދަނޑުގައި މި މުބާރާތް ފަށާފައިވާއިރު މުބާރާތުގެ ފުރަތަމަ މެޗުގައި ބައްދަލު ކޮށްފައި ވަނީ މި މުބާރާތުގެ އެންމެ ފަހުގެ ޗެމްޕިއަން ޓީމް ކަމަށްވާ ރިއަލް ސްޓާރސްއާއި އަހުލީއެވެ. މި މެޗު 1-0 ގެ ނަތީޖާއަކުން ކާމިޔާބު ކޮށްފައިވަނީ އަހުލީއެވެ
މި މެޗުގައި ފެނިގެންދިޔަ ހަމައެކަނި ލަނޑު މެޗު ނިމެން 12 މިނެޓަށް ވެފައި ވަނިކޮށް ކާމިޔާބު ކޮށްދީފައި ވަނީ އަހުލީ ޓީމްގެ ޖާރޒީ ނަމްބަރ 15، އަހްމަދު ޝިޒާންއެވެ. މެޗުގެ މޮޅު ކުޅުންތެރިއަކަށް ވެސް ހޮވިފައިވަނީ ޝިޒާންއެވެ.
މިއަދުވެސް މި މުބާރާތުގެ މެޗެއް ކުޅޭނެއެވެ. ބައްދަލުކުރާނީ ޔުނީފޯމްއާއި ޓީމް ވިކިލާނެއެވެ. މި މުބާރާތުގައި ޔުނީފޯމް ކުޅޭ ހުރިހާ މެޗެއް ގޮށްކޮޅުން ލައިވް ކުރަން ވަނީ ހަމަޖެހިފައެވެ.
މި މުބާރާތަކީ ހަނިމާދޫ ގައި ފުޓްބޯޅައިން ފާހަގަ ކޮށްލެވުނު ހުނަރުވެރިއެއް ކަމަށްވާ، އެ ޖަމުޢިއްޔާގެ މެމްބަރު އަލްމަރުޙޫމު އާދަމް ސަލީމުގެ ހަނދާނުގައި ހަނިމާދޫ ޒުވާނުންގެ ޖަމުޢިއްޔާއިން ކޮންމެ ދެ އަހަރުން އެއް އަހަރަކު ބާއްވަމުން އަންނަ މުބާރާތެކެވެ.
މި އަހަތުގެ މުބާރާތް ކުޅެން ހަމަޖެހިފައިވަނީ ކޮންމެ ޓީމެއް ކޮންމެ ޓީމަކާއި ވާދަކޮށް އެންމެ ގިނަ ޕޮއިންޓު ހޯދާ ޓީމަކަށް ފައިނަލުގެ ފުރަތަމަ ޖާގަ ލިބޭ ގޮތަށެވެ. ފައިނަލުގެ ދެވަނަ ޖާގަ ލިބިގެންދާނީ ފުރަތަމަ ބުރު ނިމޭއިރު ޕޮއިންޓު ޓޭބަލްގެ ދެވަނަ ޓީމާއި ތިންވަނަ ޓީމުގެ މެދުގައި ކުޅެވޭ ސެމީ ފައިނަލުގެ މެޗުން މޮޅުވާ ޓީމަކަށެވެ.
