އދ. ދަނގެތީގައި މަރާލާފައި އޮށްވައި ފެނުނު އެ ރަށުގެ ވިޔަފާރިވެރިއެއް ކަމަށްވާ މަހުމޫދު އަބޫބަކުރުގެ މަރާ ގުޅިގެން މައުލޫމާތު ހިއްސާކުރުމަށް ފުލުހުން މިއަދު ޕްރެސް ކޮންފަރެންސްއެއް ބޭއްވުމަށް ނިންމައިފިއެވެ.
މަހުމޫދުގެ މަރުގެ މައްސަލައިގައި ފުލުހުން ބާއްވާ ނޫސްވެރިންގެ ބައްދަލުވުން ބޭއްވުމަށް ހަމަޖެހިފައިވަނީ މިއަދު 3:45 ގައެވެ.
ދަނގެތީގައި ރަހުމު ކުޑަގޮތަކަށް މަރާލާ ވަޅަކަށް ލާފައި އޮށްވާ މަހުމޫދު ފެނިފައިވަނީ، އޭނަ ނުފެނިގެން ހޯދަމުން ދަނިކޮށެވެ.
މިމައްސަލައިގައި އެރަށުގައި އުޅޭ ބިދޭސީއެއް ހައްޔަރު ކޮށްފައިވެއެވެ. ފުލުހުން ބުނީ އެ ބިދޭސީ މީހާ ދަނގެތީގައި ދިރިއުޅެމުންދިޔަ ގެ ކޯޓު އަމުރެއްގެ ދަށުން ބަލައި ފާސްކޮށް މައްސަލައާ ގުޅުންހުރި ކަމަށް ބެލެވޭ ގިނަ އަދަދެއްގެ ތަކެތި ވަޅުލާފައިވަނިކޮށް ހޯދައި، ތަހުލީލުކުރުމަށްޓަކާ ފުލުހުންގެ ބެލުމުގެ ދަށަށް ގެންގޮސްފައިވާ ކަމަށެވެ.
އޭގެތެރޭގައި މަހުމޫދުގެ ފޯނާއި އައިޑީ ކާޑުގެ އިތުރުން މައްސަލައާ ގުޅުންހުރި އިތުރު ހެކިތަކެއް ހިމެނޭ ކަމަށް ފުލުހުން ބުނެއެވެ.
މީގެއިތުރުން ފުލުހުން ވަނީ މަހުމޫދު މަރާލުމުގައި ބިދޭސީ މީހާ ފިޔަވައި އިތުރު މީހެއް ނުވަތަ ބައެއްގެ ބައިވެރިވުން އޮތް ކަމަށް މިހާތަނަށް ފާހަގަކުރެވިފައި ނުވާ ކަމަށެވެ.
