ހިނގަމުން މިދާ ޑިސެންބަރު މަހުގެ 1ވަނަ ދުވަހު ޑރ. މުޙައްމަދު ޢަލީ ކުރައްވައިފައިވާ ޓްވީޓެއްގައި ވިދާޅުވެފައި ވެއެވެ. “ދިވެހިން މި ތިބީ އެއިޑްސް ބަލި ހިމެނޭ ގޮތަށް، ގައިން ގަޔަށް އަރާ ޖިންސީ ބަލިތައް ފެތުރި އާންމުވުމުގެ ތުންފަތްމަތީގައެވެ.” މިހެން ވިދާޅުވާން ޖެހިވަޑައިގެން ސަބަބެއް ކަމަށް ވިދާޅުވެފައިވަނީ، ރާއްޖޭގެ އާބާދީގެ ދެބައިކުޅައެއްބަޔަކީ 25 އަހަރުން ދަށުގެ އުމުރުފުރައިގެ އާބާދީއަކަށް ވެފައި، 15 އަހަރާއި 17 އަހަރުގެ 85 އިންސައްތަ ކުދީންނަކީ ޖިންސީ ގުޅުން ހިންގައިފައިވާ ބައެއް ކަމަށް، “ޔޫއެންއެފްޕީއޭ މޯލްޑިވްސް” އިން ކޮށްފައިވާ ދިރާސާއަކުން ދެއްކުމެވެ. އެހެންކަމުން، ޓްވީޓު ނިންމަވައިލައްވަމުން، އެއިޑްސް ޖެހޭ ގޮތްގޮތާއި، އެ ފެތުރޭ ގޮތްގޮތް ދެނެގަތުމަށް އިލްތިމާސް ކުރައްވައިފައިވެއެވެ.
އާދެ، ކިހައި ހިތާމަވެރި ވާހަކައެއްތޯއެވެ؟ މިއީ ސައްތައިން ސައްތަ އިސްލާމީ މުޖުތަމަޢެއްގެ ވާހަކައެވެ. އިސްލާމީ މުޖުތަޢެއްގެ ހާލަތު މިހައި ދަށު ދަރަޖައަކަށް ވެއްޓި، މިހައި ނުރައްކާތެރި ބަލިތަކެއްގެ ތުންފަތް މައްޗަށް މުޅި މުޖުތަމަޢު ހުށަހެޅިފައި ވުމީ ކިހައި ބޮޑު ދެރަކަމެއްތޯއެވެ؟ މި ދެކެވެނީ، 15 އަހަރާއި 17 އަހަރުގެ ކުދީންގެ ވާހަކައެވެ. އެ އުމުރުފުރައިގެ ކުދީންގެ އާބާދީގެ 85 އިންސައްތައިގެ ކުދީންގެ ވާހަކައެވެ. މުޖުތަމަޢުގައި ފާޙިޝް ކަންކަމާއި ޒިނޭގެ ވަބާ ފެތުރިފައި މި ވަނީ ހައިރާންވެ އަންތަރީސް ވާންޖެހޭ ދަރަޖައަކަށް ނޫންތޯއެވެ؟ މިއީ އަޅުގަނޑުމެންގެ މައްޗަށް އާންމުވެގެންވާ ކޯފާއެއް އައުން އެކަށީގެންވާ ކަމެއް ނޫންތޯއެވެ؟
ޙަދީޘްގައިވެއެވެ. ޤިޔާމަތުގެ ޢަލާމާތުގެ ތެރޭގައި ޒިނޭ އާންމުވުން ހިމެނިގެންވެއެވެ. އެހެން ޙަދީޘެއްގައިވެއެވެ. ޒިނޭއާއި ރިބާ އާންމުވެއްޖެއްޔާ، މާތް ﷲ ގެ ކޯފާއަށް، އެ ބަޔަކު އެ ބައެއްގެ ނަފުސުތައް ހުށަހަޅައިފިއެވެ. އިސްލާމްދީނުގައި ވަނީ ޒިނޭއާ ކައިރި ނުވާން އަންގަވައިފައެވެ. އަދި ޒިނޭއަށް ހުށަހެޅިދާނޭ ހުރިހާ މަގަކާއި ދޮރެއް ވެސް ބަންދުކުރައްވައިފައެވެ. އެ ކަންކަން ވަނީ އެންމެ ނުބައި ފާޙިޝް ޢަމަލުތަކުގެ ތެރޭގައި ހިމަނުއްވައިފައެވެ. އެ ކަންކަމުގައި ހިމެނޭ ދުނިޔެވީ އަޒާބާއި އުޚުރަވީ އަޒާބު ވެސް ވަނީ ބަޔާން ކުރައްވައިފައެވެ. ވުމާއެކު، އަޅުގަނޑުމެންގެ ސައްތައިން ސައްތަ މި އިސްލާމީ މުޖުތަމަޢުގައި މި ކަން އާންމުވެގެން އުޅޭ ސަބަބާ މެދު ވިސްނައި، ޒިންމާ އަދާކުރަން ޖެހޭ ފަރާތްތަކުން ޒިންމާ އަދާކުރަން އެބަ ޖެހެއެވެ. އެހެން ނޫނީ، އަޅުގަނޑުމެންގެ ހެވެއް ނެތެވެ. އަޅުގަނޑުމެންގެ މުޖުތަމަޢުގައި ހެވެއް ނެތެވެ.
އެއިޑްސް ފަދަ ނުރައްކާތެރި ބަލިތައް އާންމުވުމަކީ، އޭގެ ޒާތުގައި އިލާހީ ކޯފާގެ ތެރެއިން ހިމެނޭ ކަންކަމެވެ. އަދި ކުރިޔަށް އޮތް ތަނުގައި، އެއިޑްސްއަށް ވުރެ މާ ނުރައްކާތެރި ބަލިތައް މި ފަދަ ފާޙިޝް ކަންކަމުން އުފެދި އާލާވުމަކީ ނުވެ ނުދާނޭ ކަންކަމެވެ. “ރައްކާތެރިކަމުގެ” ފިޔަވަޅު އަޅައިގެން ޒިނޭ ކުރިއެއް ކަމަކު، އެއީ ރައްކައުތެރި ކަމެއް ނޫނެވެ. އަދި، އެއީ ނަރަކައިގެ ގަދަފަދަ އަޒާބުން އެ މީހަކު ސަލާމަތްވާނޭ ކަމެއް ވެސް ނުމެ ނޫންމެއެވެ.
މިއަދު އަޅުގަނޑުމެން ދަރީންނަށް ކިޔައިދޭންވީ، ޒިނޭގެ ނުބައިކަމާއި، އެ ޢަމަލުން ދުރުވާށެވެ. ނަރަކައިގެ އަޒާބުގެ ގަދަފަދަކަމާއި ވޭންދެނިވި ކަމެވެ. ﷲ ގެ ޙަޟްރަތުގައި ހުއްޓި ހުންނަން ޖެހޭނެ ކަމެވެ. ޒިނޭއާ ކައިރި ވެސް ނުވާށެވެ. މި ކަމުގައި މައިންބަފައިންނާއި، ވެރީންނާއި، ޢިލްމުވެރީން އެބައިމީހުންގެ ޒިންމާ އަދާކުރައްވާން ވީއެވެ. މާތް ﷲ އަށް ބިރުވެތިވާންވީއެވެ.
