އެމްޓީސީސީން ރ އަތޮޅު ދުވާފަރުގައި ކުރިއަށް ގެންދާ މަގު ހެދުމުގެ މަޝްރޫއުގެ (ދެވަނަ ފިޔަވަހީގެ) މަސައްކަތްތައް ހަލުވި ކަމާއި އެކު ކުރިއަށް ދާކަމަށް އެކުންފުނިން މިއަދު ބުނެފިއެވެ.
އެމްޓީސީސީން ބުނީ، ދުވާފަރު މަގުހެދުމުގެ މަޝްރޫއު (ދެވަނަ ފިޔަވަހި) ގެ ދަށުން، އޭބީސީ އަޅަން ބޭނުންވާ މެޓީރިއަލްސް މިހާރުވަނީ ޕްރޮޖެކްޓް ސައިޓަށް ގެންދެވިފައި ކަމަށެވެ.
މީގެ އިތުރުން ފެންހިންދާ ނިޒާމު ގާއިމުކުރުމުގެ މަސައްކަތްވެސް ތާވަލާއި އެއްގޮތަށް ކުރިއަށް ދާކަމަށާއި، އެގޮތުން މި މަސައްކަތުގެ 57 ޕަސެންޓް ވަނީ މިހާތަނަށް ނިމިފައި ކަމަށެވެ.
މި މަޝްރޫއުގެ ދަށުން، 17،790 އަކަ މީޓަރުގެ ދުއްވާ ސަރަހައްދެއް ގާއިމުކުރުމާއި، 4،960 އަކަ މީޓަރުގެ ހިނގާ ސަރަހައްދެއް ގާއިމުކުރުމާއި، ފެންހިންދާ ނިޒާމެއް ގާއިމުކުރުމާއި، މަގުބައްތި ހަރުކުރުމުގެ މަސައްކަތް ހިމެނެއެވެ.
އެމްޓީސީސީން ކުރިއަށް ގެންދާ މި މަޝްރޫއަކީ 37.8 މިލިއަން ރުފިޔާގެ މަޝްރޫއެކެވެ.
