އދ. ދަނގެތީގައި މަރާލާފައި އޮއްވާ ފެނުނު މަހުމޫދު އަބޫބަކުރު (މަހުމޫދުބެ)ގެ މަރުގެ މައްސަލައިގައި ހައްޔަރުކޮށްފައިވާ ބަންގްލަދޭޝްގެ އަލޮމް މިއާ (ސާލިމް)އަށް ދައުވާ ކޮށްފިއެވެ.
ޕްރޮސެކިއުޓާ ޖެނެރަލް (ޕީޖީ) އޮފީހުން މިއަދު ބުނީ، ސާލިމްގެ މައްޗަށް ދައުވާ ކުރުމަށް އިއްޔެ ކްރިމިނަލް ކޯޓަށް ފޮނުވާފައިވާ ކަމަށެވެ. އަދި އޭނާގެ މައްޗަށް އުފުލާފައި ވަނީ ދެ ދައުވާއެކެވެ.
އެއީ ބިރުދެއްކުމާއި ނުރައްކާތެރި ހަތިޔާރާއި ތޫނު އެއްޗެހި ގެންގުޅުން މަނާކުރުމުގެ ގާނޫނުގެ 5 ވަނަ މާއްދާގެ (ހ)އާ ހަވާލާދީ، އެ މާއްދާގެ (ނ)ގެ ދަށުން ގަސްތުގައި މީހަކު މެރުމުގެ ދައުވާއާއި، ދިވެހި ރާއްޖޭގެ ގާނޫނުލް އުގޫބާތުގެ 623 ވަނަ މާއްދާގެ (ހ)އާ ހަވާލާދީ އެ މާއްދާގެ (ށ)ގެ ދަށުން، މައްޔިތާގެ ބޭނުން ނަހަމމަ ގޮތުގައި ކުރުމުގެ ދައުވާއެވެ.
އެ މައްސަލައާ ގުޅޭ މައުލޫމާތު ހިއްސާކުރުމަށް މި މަހުގެ ދެވަނަ ދުވަހު ފުލުހުން ބޭއްވި ނޫސްވެރިންގެ ބައްދަލުވުމުގައި ފުލުހުން ބުނީ، މަހުމޫދުގެ ބޮލަށް ބޮޑު ތިން އަނިޔާއެއް ދީފައި ހުރިކަން ފާހަގަވާ ކަމަށެވެ. އަދި ހަޑިގަނޑު އެކި ތަންތަނުން 30 އަށްވުރެ ގިނަ ޒަހަމްތައް ފާހަގަ ކުރެވޭ ކަމަށާއި، ފަސް ގަޑިއިރުގެ ތެރޭގައި ތިން ފަހަރެއްގެ މަތިން ހަމަލާ ދީފައި ހުރި ކަމަށް ވިދާޅުވިއެ. ފުލުހުން ބުނީ ހަމަލާ ދިނުމަށް ފަހު މަރު ނުވާހެން ހީވި ކޮންމެ ފަހަރަކު އަނެއްކާވެސް ހަމަލާ ދީފައި ހުރި ކަމަށެވެ.
ފުލުހުން ބުނީ ސާލިމް މަހުމޫދު މަރާލީ ފައިސާގެ ބޭނުމުގައި ކަމަށެވެ. އެގޮތުން 500 ރުފިޔާގެ 20 ވަރަކަށް ނޫޓު ފެނިފައިވާ ކަމަށްވެސް ފުލުހުން ބުންޏެވެ. ނަމަވެސް ސާލިމް އެ ފައިސާ ބޭނުންވެގެން އުޅުނީ ކޮން ކަމަކަށް ކަމެއް ފުލުހުން ހާމައެއް ނުކުރެއެވެ.
