އެންޓީކޮރަޕްޝަން ކޮމިޝަން (އޭސީސީ)ގެ މެމްބަރުން ވަކި ކުރުމަށް ދައުރުން ބޭރުގައި ބާއްވާ ރައްޔިތުންގެ މަޖިލީހުގެ ޖަލްސާ މާދަމާއަށް ތާވަލު ކޮށްފި އެވެ.
މި ޖަލްސާ ބޭއްވުމަށް ހަމަޖެހިފައިވަނީ މާދަމާ ހެނދުނު10:00 ގައި އެވެ. ޖަލްސާގައި އެޖެންޑާގައި ވާގޮތުން މާދަމާ އޮންނާނީ އޭސީސީގެ މެންބަރުން ވަކިކުރުމުގެ އިޖުރާއަތްތައް ކުރިއަށް ގެންދަން ކޮމިޓީއަށް ރިޔާސަތުން ފޮނުވުމެވެ.
މަޖިލީހުގެ ގަވައިދު ބުނާގޮތުން މިނިވަން މުއައްސަސާތަކުގެ މެންބަރުން ވަކިކުރުމުގެ އިޖުރާއަތްތައް ފަށަން ފެނިއްޖެނަމަ ފުރަތަމަ ފޮނުވަން ޖެހޭނީ މަޖިލީހުގެ ރިޔާސަތަށެވެ. އެ މަސައްކަތް ފެށޭނީ، މަޖިލީހުގެ ޖަލްސާއެއްގައި ރިޔާސަތުން އެ ކަން އިއުލާން ކުރުމުންނެވެ.
އޭގެ ފަހުގައި މަޖިލީހުގެ ރިޔާސަތުން އެ މައްސަލަ މިނިވަން މުއައްސަސާތަކުގެ ކޮމިޓީއަށް ފޮނުވުމުން، އޭސީސީގެ މެންބަރުންނަށް ޖަވާބުދާރީ ވުމުގެ ފުރުސަތު ދިނުމަށް ފަހު، އަނެއްކާ ވެސް އެ ކަމާ މެދު ކޮމިޓީން ގޮތެއް ނިންމުމަށް ފަހު ތަޅުމަށް ފޮނުވަން ޖެހޭނެއެވެ.
އޭސީސީގެ މެމްބަރުން ވަކި ކުރަނީ ޒިންމާ އަދާ ނުކުރެވޭތީ ޕާފާމަންސް އޮޑިޓެއް ހެދުމަށް ފަހު އެވެ.
