ބަލީގެ އަލާމަތްތައް ހުރެގެން ކުޅުދުއްފުށީ ރީޖަނަލް ހޮސްޕިޓަލުގެ އޯޕީޑީއަށް ދެއްކި ދެ މީހަކު ކޮވިޑް-19 ޕޮޒިޓިވް ވެއްޖެ އެވެ.
ކުޅުދުއްފުށީ ރީޖަނަލް ހޮސްޕިޓަލްގެ އޮފިޝަލަކު މަޢުލޫމާތު ދެއްވިގޮތުގައި އެ ސިޓީއިން ކޯވިޑްއަށް ޕޮޒިޓިވްވެފައިވަނީ ރޯގާގެ އަލާމާތްތައް ހުރުމުން އިއްޔެ ފުލޫކްނިކަށް ދެއްކި 30 އަހަރުގެ އަންހެނަކާއި، ބަލީގެ އަލާމާތްތައް ހުރުމުން މިއަދު ފުލޫ ކްލިނިކަށް ދެއްކި 28 އަހަރުގެ ފިރިހެނެކެވެ.
30 އަހަރުގެ އަންހެން މީހާއަކީ އެ ސިޓީގައި ހުންނަ އޭޑީކޭ ކޯލްސެންޓަރގައި މަސައްކަތްކުރާ މީހެއްކަމަށް މަޢުލޫމާތުލިބެއެވެ. މި ކޭސްއާ ގުޅިގެން ކޮންޓެކްޓް ޓެރޭސިންނާއި، ސާމްޕަލް ނެގުމުގެ މަސައްކަތް ކުރަމުންދާއިރު، މިހާތަނަށްވަނީ 15 ގެއެއް ކަރަންޓީން ކޮށްފައެވެ.
28 އަހަރުގެ ފިރިހެން މީހާއަކީ މިއަދު މާލެއިން ކުޅުދުއްފުއްޓަށް ދިއަ މީހެކެވެ. އޭނާގެ އެއްވެސް ކޮންޓެކްޓެއް ނެތްކަމަށް އޮފިޝަލް މަޢުލޫމާތު ދެއްވިއެވެ.
ކުޅުދުއްފުށިން އެންމެ ފަހުން ކޯވިޑް ކޭސްއެއް ފެނިފައިވަނީ މި އަހަރުގެ ނޮވެމްބަރ މަހުގެ 7 ވަނަ ދުވަހުއެވެ.
