ފުނަދޫ ކައުންސިލް ކަޕް (އިންޓަރ އޮފީސް ފުޓްސަލް މުބާރާތް 2021) މުބާރަތް ފަށައިފިއެވެ.
އިއްޔެ ހަވީރު ފުނަދޫ ޔޫތު ސެންޓަރުގައި ގާއިމް ކޮށްފައިވާ ފުޓްސަލް ދަނޑުގައި މިމުބާރާތް ފެށިއިރު ވަނީ 3 މެޗު ކުޅެފައިވެއެވެ. އެއީ ފިރިހެން 2 މެޗާއި އަންހެން 1 މެޗެވެ. އިއްޔެ ކުޅެވުނު ފުރަތަމަ މެޗުގައި ވާދަކުރީ ޔުނައިޓެޑް ބީއެމްއެލް އާއި ހޮސްޕިޓަލް އެވެ. 10 ލަނޑު 4 ލަނޑު މެޗު ކާމިޔާބުކުރީ ހޮސްޕިޓަލް އެވެ. އިއްޔެ ކުޅެވުނު ދެވަނަ މެޗުގައި ވާދަކުރީ ސްކޫލާއި ޕޮލިސް ޓީމެވެ. މިމެޗު 7 ލަނޑު 5 ލަނޑުން ކާމިޔާބު ކުރީ ޕޮލިސް ޓީމެވެ. ތިންވަނަ މެޗަކީ އަންހެން ފަޅީގެ މެޗެކެވެ. އެމެޗުގައި ވާދަކުރީ ސްކޫލް އާއި ކައުންސިލް އެވެ. 3 ލަނޑު 1 ލަނޑުން މެޗު ކާމިޔާބުކުރީ ކައުންސިލް އެވެ.
މިއަދު ވެސް މިމުބާރާތުގެ ތިންމެޗުކުޅޭނެއެވެ. މިއަދު ހަވީރު ފުރަތަމަ މެޗުގައި ބައްދަލުކުރީ ފުނަދޫ ކައުންސިލާއި އެއާޕޯޓެވެ. މިމެޗް 9 ލަނޑު 1 ލަނޑުން ކާމިޔާބުކުރީ ކައުންސިލް ޓީމެވެ.
މިރޭ ކުޅޭ ފުރަތަމަ މެޗުގައި ބައްދަލުކުރާނީ ފިރިހެން ޑިވިޝަނުގެ ފެނަކަ އަދި ޖެންޑާއެވެ. ފަހު މެޗުގައި ބައްދަލުކުރާނީ އަންހެން ޑިވިޝަނުގެ ޖެންޑާ އަދި ހޮސްޕިޓަލެވެ.
މި މުބާރާތަކީ ފުނަދޫ ކައުންސިލްގެ ފަރާތުން 2012 ވަނަ އަހަރުންފެށިގެން އިންތިޒާމްކޮށްގެން ބާއްވަމުން އަންނަ މުބާރާތެކެވެ. މިއީ މިމުބާރާތް ބާއްވާ 9 ވަނަ އަހަރެވެ.
މި މުބާރާތުގައި ވާދަކުރާ ފިރިހެން ޑިވިޝަންގެ ޓީމްތަކަކީ ޔުނައިޓެޑް ބީއެމްއެލް، ހޮސްޕިޓަލް، ޖެންޑާ، ފެނަކަ، ފުނަދޫ ސްކޫލް، އެއާރޕޯރޓް، ޕޮލިސް އަދި ކައުންސިލް އެވެ. އަދި އަންހެން ޑިވިޝަންގައި ބައިވެރިވެފައިވަނީ ޖެންޑާ، ހޮސްޕިޓަލް، ސްކޫލް އަދި ފުނދޫ ކައުންސިލެވެ.
