ކުރީގެ ރައީސް މައުމޫން އަބްދުލް ޤައްޔޫމް އިންޑިއާ އިން ރާއްޖެއަށް ކަނޑައަޅުއްވާފައި ހުންނަވާ ސަފީރު މުނޫ މަހާވަރު އާއި ބަައްދަލު ކުރައްވައިފި އެވެ.
ރައީސް މައުމޫން މިއަދު ކުރެއްވި ޓުވިޓެއްގައި ވިދާޅުވީ، އިންޑިއާއިން ރާއްޖެއަށް ކަނޑައަޅާފައި ހުންނަވާ ސަފީރު މުނޫ މަހާވަރު އާއި ބައްދަލުކޮށް، ރާއްޖެ އާއި އިންޑިއާއާ ދެމެދު އޮތް ގާތް ރަހުމަތްތެރި ގުޅުމާ ގުޅޭގޮތުން ވަރަށް އެކުވެރި މާހައުލެއްގައި މަޝްވަރާ ކޮށްފައިވާ ކަމަށެވެ. އަދި އެ މަނިކުފާނު ވަނީ ސަފީރު މުނޫގެ ވިސްނުންފުޅަށް ޝުކުރު އަދާ ކުރައްވާފަ އެވެ.
ރައީސް މައުމޫން އިންޑިއާ ސަފީރާއި ބައްދަލުކުރައްވާފައިވާއިރު މި ދަނޑިވަޅަކީ ރާއްޖޭގައި ތިބި އިންޑިއާ ސިފައިން ބޭރުކުރުމަށް ރާއްޖޭގެ އެކި ކަންކޮޅުތަކުގައި “އިންޑިއާ އައުޓް” ނަމުގައި ކުރީގެ ރައީސް ޔާމީން އަބްދުލް ޤައްޔޫމް އިސްވެ ހުންނަވާ އިދިކޮޅު ކޯލިޝަނުން ބޮޑު ހަރަކާތެއް ފަށާފައިވާ ދުވަސްވަރެކެވެ. އެގޮތުން މި ހަރަކާތް އިތުރަށް ފުޅާ ވެގެން ގޮސްފައިވަނީ ރައީސް ޔާމީން ޖަލުން މިނިވަން ވުމާއި އެކީ އެމަނިކުފާނު އަމަލީ ގޮތުން މި ހަރަކާތުގައި ބައިވެރިވެ ވަޑައި ގަތުމުންނެވެ.
އެގޮތުން މިދިޔަ ހަފްތާގައި ކ. ތުލުސްދޫގެ އިތުރުން ކ. ގުރައިދޫގައި ވެސް އިންޑިއާ އައުޓް ހަރަކާތް ވަނީ ކުރިއަށް ގެންގޮސްފައެވެ. މީގެ އިތުރުން، އިދިކޮޅު ކޯލިޝަނުން މަޢުލޫމާތު ދޭ ގޮތުގައި ބުރާސްފަތި ދުވަހު އިންޑިއާ އައުޓް ހަރަކާތް ފ. ނިލަންދޫގައި ކުރިއަށް ގެންދިޔުމަށްޓަކައި ރައީސް ޔާމީން އެ ރަށައް ވަޑައި ގަންނަވާނެއެވެ.
