ކޮވިޑް 19 ކޭސްތަކާ ގުޅިގެން މުދުގަނޑާލި އާދަމް ސަލީމް ކަޕް 2021 މިމަހު 21 ގައި ފަށަން ނިންމާފައިވާކަމަށް ހަނިމާދޫ ޒުވަނުންގެ ޖަމިއްޔާއިން ވިދާޅުވެއްޖެއެވެ.
ހަނިމާދޫ ޒުވާނުންގެ ޖަމިއްޔާގެ ފަރާތުން މައުލޫމާތު ހިއްސާކުރަމުން އެ ޖަމިއްޔާގެ ކުޅިވަރު ސެކެއްޓްރީ މުޙައްމަދު ނާސިރު ވިދާޅުވީ ކޮވިޑް 19 ކޭސްތައްފެނި ގިނަ ކުޅުންތެރިން ކަރަނޓީން ވާންޖެހުމުން މެދުގަނޑާލި އާދަމް ސަލީމް ކަޕް 2021 މިމަހު 21 ގައި ފަށަން ތާވަލު ކޮށްފައިވާކަމަށެވެ.
އިތުރަށް ވާހަކަ ކުރިއަށް ގެންދަވަމުން ނާސިރު ވިދާޅުވީ ކޮންމެ ޓީމަކަށްވެސް 6 ބަދަލު ގެނައުމުގެ ފުރުސަތު ދެވިފައި ވާނެކަމަށެވެ. އެއީ ރަށުން ބޭރު 3 ކުޅުންތެރިން ތެރޭން ކުޅުންތެރިން އުނިކޮށް އައު ކުޅުތެރިން ޖެހުމާއި ރަށު 3 ކުޅުންތެރިން އުނިކޮށް އައު 3 ކުޅުންތެރިން ޓީމް ލިސްޓުގައި ޖެހުން ކަމަށް ނާސިރު ވިދާޅުވިއެވެ.
އާދަމް ސަލީމް ކަޕް 2021 ފަށާފައިވަނީ 27 ނޮވެންބަރު 2021 ވަނަދުވަހު ހަވީރުއެވެ. އެ މުބާރާތް ކޮވިޑް 19އާ ގުޅިގެން މެދުކަނޑާލީ 8 ޑިސެންބަރު 2021 ގައެވެ.
އާދަމް ސަލީމް ކަޕް މުބާރާތަކީ ހަނިމާދޫ ގައި ފުޓްބޯޅައިން ފާހަގަ ކޮށްލެވުނު ހުނަރުވެރިއެއް ކަމަށްވާ، ހަނިމާދޫ ޒުވާނުންގެ ޖަމިއްޔާގެ މެމްބަރު އަލްމަރުޙޫމު އާދަމް ސަލީމުގެ ހަނދާނުގައި ހަނިމާދޫ ޒުވާނުންގެ ޖަމިއްޔާއިން ކޮންމެ ދެ އަހަރުން އެއް އަހަރަކު ބާއްވަމުން އަންނަ މުބާރާތެކެވެ.
މި އަހަރުގެ މުބާރާތް ކުޅެން ހަމަޖެހިފައިވަނީ ކޮންމެ ޓީމެއް ކޮންމެ ޓީމަކާއި ވާދަކޮށް އެންމެ ގިނަ ޕޮއިންޓު ހޯދާ ޓީމަކަށް ފައިނަލުގެ ފުރަތަމަ ޖާގަ ލިބޭ ގޮތަށެވެ. ފައިނަލުގެ ދެވަނަ ޖާގަ ލިބިގެންދާނީ ފުރަތަމަ ބުރު ނިމޭއިރު ޕޮއިންޓު ތާވަލުގެ ދެވަނަ ޓީމާއި ތިންވަނަ ޓީމުގެ މެދުގައި ކުޅެވޭ ސެމީ ފައިނަލުގެ މެޗުން މޮޅުވާ ޓީމަކަށެވެ.
