ކުޅުދުއްފުށީ ސިޓީއިން އިތުރު 17 މީހަކު ކޯވިޑްއަށް ޕޮޒިޓިވްވެއްޖެއެވެ.
އެ ސިޓީއިން މިއަދު ޕޮޒިޓިވްވެފައިވަނީ ރާއްޖެއިން ބޭރަށް ދިއުމަށްޓަކައި އިއްޔެ ނެގި ސާމްޕަލް އަކުން ޕޮޒިޓިވްވީ 39 އަހަރުގެ އަންހެން މީހާގެ ކޮންޓެކްޓުންގެ ގޮތުގައި ފާހަގަކުރެވުނު މީހުންގެ 14 ސާމްޕަލަކާއި، ބަލީގެ އަލާމާތް ހުރެގެން ފްލޫކްލިނިކަށް ދެއްކި މީހުންގެތެރެއިން 3 ސާމްޕަލެކެވެ.
އެ ސިޓީގައި ކޯވިޑްގެ ކޭސްތައް އިތުރުވަމުންދާތީ 101 ރޭންޑަމް ސާމްޕަލް އިއްޔެ ނަގާފައިވާއިރު، 1 ސާމްޕަލް ފިޔަވައި ހުރިހާ ސާމްޕަލް ނެގެޓިވްކަމަށާއި، 1 ސާމްޕަލް އިންކޮންކްލޫސިވްކަމަށް ކުޅުދުއްފުށީ ރީޖަނަލް ހޮސްޕިޓަލުން މަޢުލޫމާތުދެއެވެ.
ކުޅުދުއްފުށިން ކޯވިޑް ކޭސްއެއް ނުފެނި ދުވަސްކޮޅެއް ދިއުމަށްފަހު އެންމެ ފުރަތަމަ ކޯވިޑް ކޭހެއް ފެނިފައިވަނީ މިދިއަ ޑިސެމްބަރ މަހުގެ 20 ވަނަ ދުވަހުއެވެ.
މިހާތަނަށް 50 މީހުން ޕޮޒިޓިވްވެފައިވާއިރު، އޭގެތެރޭގައި ކުޅުދުއްފުށީ ރީޖަނަލް ހޮސްޕިޓަލްގެ 3 ޑޮކްޓަރަކުވެސް ހިމެނެއެވެ. މިވަގުތު އެ ސިޓީގައި ތިބި އެކްޓިވް ކޭސްގެ އަދަދަކީ 41 އެވެ.
