ކުޅުދުއްފުށީ ސިޓީއިން އިތުރު 14 މީހަކު ކޯވިޑްއަށް ޕޮޒިޓިވްވެއްޖެއެވެ.
އެ ސިޓީއިން މިއަދު ޕޮޒިޓިވްވެފައިވަނީ ކޮންޓެކްޓް ޓްރޭސިންގެތެރެއިން ފާހަގަކުރެވުނު 12 ސާމްޕަލަކާއި، ބަލީގެ އަލާމާތްތައް ހުރެގެން ފްލޫ ކްލިނިކަށް އިއްޔެ ދެއްކި 18 އަހަރާއި، 58 އަހަރުގެ އަންހެނެކެވެ.
އެ ސިޓީއިން އިއްޔެވަނީ 17 މީހަކު ކޯވިޑްއަށް ޕޮޒިޓިވްވެފައެވެ. މިވަގުތު އެ ސިޓީގައި ތިބި އެކްޓިވް ކޭސްގެ އަދަދަކީ 48 އެވެ.
ކުޅުދުއްފުށިން ކޯވިޑް ކޭސްއެއް ނުފެނި ދުވަސްކޮޅެއް ދިއުމަށްފަހު އެންމެ ފުރަތަމަ ކޯވިޑް ކޭހެއް ފެނިފައިވަނީ މިދިއަ ޑިސެމްބަރ މަހުގެ 20 ވަނަ ދުވަހުއެވެ.
